Vil fôre oppdrettslaks med norsk gran

– Alt som har ein miljøgevinst er vi positive til, seier Bernt-Olav Røttingsnes.

Han er konsernsjef for Nordic Aquafarms. Selskapet sto for det første storskala landbaserte oppdrettsanlegget for laks i Noreg.

I eit stort lagerbygg i Fredrikstad svømmer laksen i to basseng. I dag blir fisken mata mellom anna med soya.

Men i nær framtid står kanskje noko langt meir kortreist på menyen.

– Alle sånne nye typar fôr som gjer fisken betre, og gir betre produksjon, er vi interesserte i. Vi er alltid på jakt etter nye ingrediensar, saman med fôrleverandørane, seier Røttingsnes.

Sopp av gran

I dag er det soya frå Brasil som er hovudfôret til norsk oppdrettslaks. Men snart kan norsk gran vere eit alternativ.

Det vil ikkje berre skape gode miljøgevinstar med kortreist mat, men det vil også gjere fisken friskare.

Det viser eit nytt prosjekt frå forskingsinstituttet Foods of Norway ved Noregs miljø- og biovitskaplege universitet (NMBU) i Ås.

Fôret som blir produsert av gran inneheld også like mykje næring som soya.

– Vi ser at vi har eit proteininnhald på 65 prosent, og at laksen greier å fordøye mykje av norsk gran. Med denne typen fôr veks laksen også fortare, seier professor Margareth Øverland.

Maten som blir gitt til laksen er sopp, anten gjær eller pekilo, av gran.

– Det er heilt avgjerande å finne alternative råvarer, så vi slepp å vere avhengige av import. Men desse råvarene må jo vise at dei fungerer i fisken, seier professor Øverland.

Peikar på fôrleverandørane

Arnøy Laks i Troms kjøper, som mange andre, fôr frå ulike leverandørar. Oppdrettaren meiner ballen ligg hos dei.

– Skulle denne innsatsen resultere i nye fôr-råvarer som kan gå inn i kosthaldet til laksen, så vil vi alltid vere positive. Gran har vi mykje av, og det vil gi tryggleik og tilgang, men også sikre miljøet, seier oppdrettssjef Håvard Høgstad.

Han ønskjer ny forsking på området velkommen.

– Norsk lakseoppdrett har fått mykje kritikk for at det blir brukt vegetabilske produkt og ikkje berre fôr av marine råvarer. Viss vi kan gå over på andre alternativ som ikkje går ut over fisken, så er dette interessant.

Vil framleis bruke soya

Selskapet Skretting er ein av dei største fôrleverandørane i havbruksnæringa i Noreg. Dei meiner det er uaktuelt å stoppe soya-produksjonen, fordi dei er avskogingsfrie.

– Det er viktig for oss å halde fram slik at alle brasilianske bønder ser at det lønner seg å stoppe avskoging, seier berekraftsansvarleg Leif Kjetil Skjæveland.

Han trur ikkje forskinga frå NMBU er fasiten på lakseoppdrett i framtida.

– Vi har store forhåpningar til prosjektet, og det blir spennande å sjå kva slags råvarer dette blir. Vi må teste råvara for å sjå at det fungerer i laksefôret.

Fiskematen som blir laga av gran inneheld 65 prosent protein. Forskinga har vist at ho er lett fordøyeleg, noko som kan gi friskare laks.

– Alle råvarer vi bruker i dag, gjer at laksen held seg så frisk som mogleg. Det er ikkje sånn at han blir sjuk av det han får, anten det er soya, raps, kveite eller fiskemjøl, seier Skjæveland.

Han trur verda kjem til å ete meir sjømat framover, og at produksjonen må opp.

– Det er ikkje meir skadeleg for miljøet å frakte råvarer på skip som køyrer sakte over Atlanteren, enn å frakte det med bil gjennom Europa. Det som er viktig, er måten råvarene blir dyrka på, seier han.

Les også: Snart kan du kjøpe norsk laks som aldri har svømt i havet

Les også: En av disse potetene kan gi deg mageproblemer