Reisebrev frå Nisse-Nils

Kva skjer eigentleg viss NRK skaffar seg ein liten tøynisse, reiser til eit kjøpesenter i Drammen og leverer han der med oppgåva:

«Besøk flest moglege stader i løpet av kortast mogleg tid fram mot jul»?

Det var i alle fall utgangspunktet då NRK Buskerud for andre året på rad sende «Nisse-Nils» ut på eventyr. I 2021 reiste nissen heile vegen til Spania før han vart borte. I år forlét han aldri Norge, men reisa vart ikkje mindre eksotisk av den grunn.

Her er nokre av høgdepunkta:

Folk

Nisse-Nils har først og fremst møtt dykk. Mange menneske. Og vi har gjennom heile adventstida fått høyre historiene deira.

Dette er berre eit lite utval:

Svalbard

Julaftan var Nisse-Nils på Svalbard.

– God jul! Nisse-Nils er på Svalbard, ler Torbjørn Staff.

I år, som i fjor, var det nettopp slik at Nisse-Nils rett og slett vart borte. Men på sjølvaste vesle julaftan dukka han opp på Svalbard lufthamn.

– Eg fekk han i handa av ein kollega som sa: Her har du ei oppgåve, Torbjørn. Ver så god!

Staff, som opphavleg er bergensar, jobbar med «groundhandling» og har derfor mellom anna ansvaret for frakt og bagasje.

– Svalbard er ein fantastisk plass. Det er så flotte menneske her oppe, seier Staff som tidlegare har hatt same jobb på Flesland, men som kjem frå jobb med stillas i Bergen.

– Treng ikkje seie noko meir enn at det regnar mykje i Bergen, og når du jobbar utandørs med stillas så kjenner du det på kroppen at det er «dritvêr» i Bergen, smiler Staff, før han poengterer at han har bytt ut Bergen med Spitsbergen.

Bergensaren tok deretter med Nisse-Nils på julefeiring med venner på Svalbard.

– Det blir pinnekjøtt. Ein held på dei tradisjonane ein har teke med seg frå fastlandet. Det blir triveleg. Det er ein skjønn gjeng eg skal feire med, seier Staff.

Vega

Det er ikkje alle som får oppleve vakre Vega på Helgeland i Nordland. Men Nisse-Nils fekk besøkje staden som står på Unescos liste over verdsarv.

Hos Vega Mekaniske dukka nissen opp 16. desember, i ei eske med diverse filtar.

– Det var ei kjempeartig overrasking, seier dagleg leiar, Tomas Rautila.

Han trudde først nissen var ei lita gåve frå kollegaene i Namsos, men skjønte fort at Nisse-Nils hadde eit større oppdrag.

– Han fekk vere med på litt brøyting med hjullastaren her. Vi har fått veldig mykje snø, seier Rautila. Han bestemde seg likevel for at nissen måtte vidare. Og at det var første person inn døra som skulle få ho med seg.

Dermed vart det 15 minutt på verkstad, men ikkje lenge hos nestemann heller. For Nisse-Nils måtte vidare og bort frå Vega. Postbilen til Kate Kjørsvik vart redninga.

Her fekk Nisse-Nils vere med på noko han har litt erfaring med. Å levere julepost.

– Vi har levert julegåver og post til folk på Vega, og så fekk Nils sitje på skuldra til kapteinen på Vega-ferja, ler Kjørsvik.

Deretter bar det ut i skogen for å vere med på hente juletre, men litt meir pynting enn det trong ikkje postbodet hjelp til.

– Eg pyntar alt klart 1. desember. Då er det berre koseleg julegåveshopping og baking som står att, seier Kjørsvik.

Kystruta

I Brønnøysund hoppa Nils på Kystruta, og vart med nedover mot Bergen.

– Nissen har det veldig bra. Han sit her oppe på brua og koser seg, seier overstyrmann Alan Sedolfsen.

20. desember var dei på veg inn mot Kristiansund.

– Eg blir verande ombord til 14. januar, seier Sedolfsen om si eiga reise. Han fekk dermed både julefeiring og nyttårsfeiring ombord på båt.

– Det går heilt fint. Vi har halde på med dette i mange år. Annakvar jul er vi heime og annakvar jul er vi ombord, seier han og legg til:

– Vi har det triveleg. Gode kollegaer og god mat. Fin julestemning.

Hittegodskontoret

13. desember vart det Lucia-feiring for Nils på hittegodskontoret til Studentsamskipnaden i Oslo. Det kunne fort ha blitt siste stopp på reisa for nissen, men heldigvis fekk han fritak frå reglane slik at han kunne komme seg vidare.

«Hei,

Nisse-Nils dukka i dag tidleg opp i Hittegodskontoret til Studentsamskipnaden i Oslo (SiO), ifølgje prosedyren skal han vere her i to veker og så bli destruert viss ingen hentar han.

Toma driv Hittegodskontoret på vegner av SiO og vil i dette tilfellet avvike reglane for hittegodshandtering, då to veker på eit lager no blir vurdert å vere lite gunstig for ein nisse.

Nisse-Nils reiser vidare.»

Det siste vi har høyrt frå Nisse-Nils var at han var på veg frå Svalbard til fastlandet. Vi veit ikkje kvar han endar opp, men reisa hans har vore fin.