Glas og ramme.
Det er det einaste som skil bussjåførar frå motgåande køyretøy dersom ei ulykke hender.
Bussbransjen har i årevis åtvara om den manglande tryggleiken, som har kosta minst ti bussjåførar livet sidan 2011. Seinast i romjula omkom ein bussjåfør i ei møteulykke i Fredrikstad.
Eit forslag om betre kollisjonstryggleik er på trappene. Ifølgje samferdselsminister Jon Ivar Nygård (Ap) vil tryggingskravet tre i kraft seinast 1. januar neste år.
Ei rekkje bransjeorganisasjonar NRK har vore i kontakt med meiner det foreslåtte tryggingskravet ikkje held mål.
No innrømmer også samferdselsministeren at tryggleiken til bussjåførane ikkje blir godt nok vareteken med den foreslåtte endringa.
– Som mange av bransjeaktørane, er eg er samd i at standarden som no blir innført ikkje gir tilstrekkeleg tryggleik for sjåførane, skriv Nygård i ein e-post til NRK.
Dette skal innførast
Tryggingskravet som no er til behandling hos departementet vart sendt på høyring av Statens vegvesen i fjor.
Forslaget inneber at alle nye bussar må utstyrast med ein stålbjelke i midten av fronten på bussane.
Meir enn halvparten av høyringssvara som kom inn påpeika at det er nødvendig med endå betre tryggleik.
Vegvesenet anslår at tryggingsoppgraderinga vil koste rundt 30.000 kroner per buss.
Vil uansett oppfylle kravet
Ei kartlegging Kollektivtrafikkforeininga har gjennomført viser at alle offentlege kollektivselskap allereie krev at nye bussar blir leverte med kollisjonsvern i fronten.
– Vi visste at veldig mange hadde det, men vi visste ikkje at det var så mange, seier dagleg leiar Olov Grøtting.
Dei representerer dei store offentlege kollektivselskapa i Noreg.
Fleire møteulykker
I romjula omkom ein bussjåfør i 50-åra etter ei møteulykke mellom to bussar i Fredrikstad. Den andre sjåføren vart alvorleg skadd, og måtte amputere eit bein.
Dette er den tredje møteulykka på seks år der ein bussjåfør har mista livet.
Mellom 2011 og 2020 var 240 bussar involverte i møteulykker, viser tal frå Statens vegvesen. Åtte bussjåførar omkom i desse ulykkene.
Statens havarikommisjon undersøkjer alvorlege trafikkulykker. Dei har fleire gonger teke til orde for at bussjåførar bør bli betre sikra.
– Undersøkingane våre har vist at kollisjonstryggleiken for buss er lågare enn for andre køyretøygrupper, sa Ingvild Ytrehus i havarikommisjonen til NRK i februar.
Vil skjerpe internasjonale reglar
I dag finst det ingen nasjonale eller internasjonale krav til kollisjonstryggleik i fronten av bussar.
Sjølv om bransjen har teke tryggleiken i eigne hender, meiner Grøtting i Kollektivtrafikkforeningen det er bra at regjeringa vil lovfeste kravet.
– Noreg er i forkant, og då tenkjer eg det er veldig rett og viktig at det blir forskriftfesta, seier Grøtting.
Samferdselsminister Nygård opplyser til NRK at han vil jobbe vidare for å auke tryggleiken til bussjåførane.
– Vi vil arbeide vidare både med å vurdere ytterlegare skjerpa krav til nasjonal løyvepliktig transport, og prøve å påverke det internasjonale arbeidet med regelverk.