Nordlyssesongen er i gong: – Det er ikkje ofte det går så langt sør

– Vi har fått ein del meldingar om observasjonar av nordlys i natt, også i Osloområdet. Det er ikkje ofte det går så langt sør, seier meteorolog Eldbjørg Moxnes.

Ho fortel at det gjerne er nokre episodar gjennom nordlyssesongen.

Den er i hovudsak frå oktober til mars, når det er mørkast ute. Ein er og avhengig av at det er klarvêr, slik at skyar og tåke ikkje dekker det til.

– Sesongen har akkurat starta, så det kjem nok fleire moglegheiter. Men det er sjølvsagt meir vanleg lenger nord i landet, enn her på Austlandet, seier ho.

Derfor får vi nordlys

KP-indeks er ein skala frå null til ni. Den brukast for å seie kor sannsynleg det er å sjå nordlys, som kjem av solvind.

– Solvind er masse partiklar med mykje energi som blir slengt ut frå sola i enorm hastigheit, og flyg gjennom verdsrommet, forklarer Wojciech Miloch.

Han er professor ved Universitetet i Oslo, og kan mykje om blant anna plasma- og romfysikk.

Desse partiklane kan treffe jorda. Men ingen fare, forsikrar Miloch: vi er beskytta av eit magnetfelt.

Når solvinden er sterk dyttar den på magnetfeltet som er rundt jordkloden.

Nokon partiklar sprett vidare ut i verdsrommet, mens andre lekk gjennom og blir fanga rundt jorden.

Der reiser partiklane mot Nord- og Sørpolen, som er magnetiske.

– Og igjen, ingen fare! Dei stoppar når dei er 100–200 kilometer over hovudet vårt, så det er ikkje farleg å bu i nord, seier Miloch.

Der flyg dei og kolliderer med gassane i atmosfæren.

– Når gassane blir treft får dei ny energi. Da hoppar elektrona i atoma, men det er slitsamt å ha mykje energi heile tida, så da sender dei energien ut igjen i form av lys, forklarar forskaren.

KP-indeksen er litt svakare natt til torsdag, men det er likevel ikkje umogleg at det vil dukke opp, meiner Moxnes.

– Det var nok best moglegheiter i natt, men det ser ut som det blir klarvêr også natt til torsdag. Så da blir det kanskje fleire moglegheiter, i kvart fall frå Oslo og oppover, seier meteorologen.