Får kommunetilsette sjå på OL?

Det kan bli ein sport i seg sjølv, å både halde fokus på arbeidsoppgåvene og samstundes få med seg eit og anna glimt av OL i Sotsji. For dei tilsette i kommunane kan det vere greitt med ei avklåring. Er det lov?

Kjell B. Hansen, ordførar i Ringerike:

– Det formelle svaret er at dei tilsette er her for å arbeide, og rådmannen må passe på at brukarane og kundane våre får dei tenestene dei skal. Men: Vi må ha tillit til folk, smiler ordføraren i Ringerike.

– Når ville du reagert?

– Dersom ein brukar ikkje får hjelp fordi nokon må ha med seg innspurten i eit skiløp så er det ikkje greitt. Då ville det blitt påpeika.

– Kva er greitt?

– Vel, dersom Anders Jacobsen ligg veldig godt an, og vi snakkar om spanande finalar, så er det vel ikkje krise for Ringerike kommune i akkurat dei 20 sekunda, flirer han.

Vidar Lande, ordførar i Kongsberg:

– Det er ikkje slik at ein skal sitte å nistire på alle sendingar, men det kjem til å bli store augneblinkar i Sotsji. Noko kiking må vi vel godta, seier han.

– Når kjem du til å smuglese på pc-en din?

– Hehe, eg må setje meg ned og sjå gjennom OL-programmet før eg veit kva som skjer. Eg pleier å vere på OL sjølv, men i år valde eg det vekk. Det blir vel skiskyting, hopp, langrenn og fristil.

– Kan tilsette bli sagt opp for å sjå for mykje OL?

– Nei, neppe. Men det er dette med tillit under ansvar då.

Helene Justad, ordførar i Lier:

– Man kan aldri vere sikker på kor mykje dei tilsette kjem til å følge med, sportsinteressa er ulik. Eg stoler på at dei disponerer tida si rett og gjer jobben sin.

– Når du går forbi ein tilsett som sitter og nistirar på OL-oppdateringar på skjermen sin, blir du stressa då?

– Nei, absolutt ikkje. Kanskje eg til og med stoppar opp og kikkar over skuldra og spør om kva som er siste nytt.