Heikki Holmås stilte tidligare i år eit ultimatum, han måtte enten stå på førsteplass på nominasjonslita, eller ingen plass. I eit intervju med NRK for to veker sidan sa Chaudhry seg ueinig med å stille slike ultimatum.
- Les også: Tøff omkamp mellom Holmås og Chaudhry i SV
- Les også: 300 nye SV-arar skal stemme på Chaudhry eller Holmås
– Det er aldri nokon som har klart å true seg til posisjonar i Oslo SV eller SV generelt. Det vil i så fall bli ein ny tradisjon, sa Chaudhry.
No ser det derimot ut som han sjølv er med på å gjere det til ein ny tradisjon.
To ultimatum som kolliderar
I går mottok nominasjonskomiteen eit brev frå Chaudhry der han stiller eit ultimatum til komiteen og alle medlemmane i Oslo SV.
– Eg stiller kun på førsteplass, skreiv han i brevet. Dette er akkurat same beskjed Holmås har stilt tidligare.
Nominasjonskomiteen vart på møte i går einige om å ta eit ekstramøte i ettermiddag.
– Grunnen til det var beskjeden vi fekk frå Chaudhry. Det vart så kort tid at vi måtte utsetje avgjersla, seier leiaren av nominasjonskomiteen, Kim-André Åsheim.
– Så no vert det slik at Chaudhry eller Holmås innstillast på førsteplass, og den andre vert ikkje med på lista i det heile tatt.
Han legg til at komiteen i tillegg må finne ein ny tredjeplass.
Ekstra motvind
I dag fekk Chaudhry også meir motvind. Fylkesleiar i Oslo SV, Nora Fjelddalen, seier til VG i dag at Chaudhry trua ho på telefonen etter at ho hadde vist støtte til Holmås på Facebook.
Fjelddalen skreiv i Facebook-posten at Chaudhry hadde varsla storstilt verving.
Chaudhry seier til NRK at han ikkje kjenner seg igjen i hennar skildring. Han innrømmer å ha ringt til Fjelddalen, og at Facebook-posten hennar var tema.
– Eg opplevde at påstanden var udokumentert. Fylkesleiaren fremmar dette på Facebook-profilen sin, i tillegg til at ho er kampanjeleiar for Heikki Holmås, seier Chaudhry.
Han fortel vidare at han vart paff og ringte ho for å høyre om ho hadde dekning for påstanden.