Målprisen vert delt ut ved opninga på landsmøtet i Noregs Mållag.
Det er Hildri Gulliksen, programredaktør i NRK Super, som tek imot prisen på vegner av NRK Super og det er Marit Aakre Tennø, leiar i Noregs Mållag, som deler ut prisen.
Tek språk og barn på alvor
– NRK Super får prisen fordi dei tek barn i heile landet på alvor også språkleg, gjennom systematisk satsing på språkleg variasjon, mangfald og ulike produksjonsstader. På få år er nynorskbruken meir enn dobla, seier Tennø.
- Det er veldig stas å få denne prisen. Vi har jobba bevisst for å bli betre. Målprisen heng godt saman med NRK Supers visjon om å skape ei verd kor barn veks og er viktige, seier Gulliksen.
- Språk, identitet og sjølvkjensle er knytt veldig tett saman. Alle barn i Noreg skal oppleve at NRK Super er deira univers, understrekar Gulliksen.
Ikkje noko opplagd kandidat
Tennø peikar på at ved oppstarten av NRK Super i 2008 var det ikkje nokon opplagt priskandidat å sjå i dei. Nynorskbruken var på eit lågmål, og i dei første diskusjonane tyda mykje på at endringar ville ta tid.
– Den snuoperasjonen som har skjedd, er det grunn til å applaudera – for ikkje å seia prisa, seier Tennø. Ho meiner NRK er svært viktig.
- For nynorsken, for dialektane, for samisk, ja for alle andre enn bokmålet og det sentrale austlandet, ville fjernsynstilbodet i Noreg sett heilt annleis ut utan ein allmennkringkastar som NRK. Dei mange ulike og skiftande mindretala treng NRK, som kan ta omsyn til alle i tur og orden og stå for variasjon endå om det kostar, seier Tennø.
Målprisen 2014 til NRK Super
Noregs Mållag gir Målprisen 2014 til NRK Super.
Publisert
Artikkelen er flere år gammel.
Publisert