- Prisveksten er no i underkant av målet på 2,5 prosent. Krona har styrkt seg. Saman med låge importprisar vil det bidra til å halde prisveksten under målet det nærmaste året, seier visesentralbanksjef Jan F. Qvigstad.
Han seier at det framleis er ein risiko for at veksten i verdsøkonomien kan bli låg i ein lengre periode.
- Styringsrenta i mange land er nær null, og marknadsrentene ute har falle. Derfor er det no rett å halde styringsrenta uendra, seier Qvigstad.
Visesentralbanksjefen framheld at norsk økonomi har klart seg godt gjennom finanskrisa. Høg aktivitet i oljeindustrien har saman med tiltaka i penge- og finanspolitikken vore med på å halde etterspurnaden etter varer og tenester oppe.
- Sysselsetjinga er stabil, og arbeidsløysa ser ut til å bli vesentleg lågare enn venta, trass i nedgang i industrien og i bygg og anlegg. Alternativet i dag var å auke renta ved dette møtet, seier Qvigstad.