Bankkundar med innskot på over 100.000 euro i Bank of Cyprus risikerer å tapa rundt 60 prosent av sparepengane sine, opplyser sentralbanken og finansdepartementet på Kypros laurdag.
Dei med innskot på over 100 000 euro, vil i første omgang få 40 prosent av dette konvertert til bankaksjar, slik styresmaktene varsla tidlegare denne veka.
Men dersom banken har behov for enda meir kapital, må storspararane finna seg i å tapa ytterlegare 22,5 prosent.
Ny avgift for å blidgjera EU
Nøyaktig kor mykje det endelege tapet blir på, blir først klart etter at styresmaktene har vurdert kor mykje som må til for å stabla dei kriseråka bankane på beina igjen.
Årsaka til tapet er den nye avgifta som styresmaktene nyleg vedtok å innføra.
Avgifta er ein føresetnad for å få ein redningspakke på ti milliardar euro frå EU og Det internasjonale pengefondet (IMF), eit lån Kypros treng for å redda seg sjølv ut av ei djup bankkrise.
Øystaten blei sterkt råka av den økonomiske krisa i Hellas. Kypriotiske bankar tapa rundt 4,5 milliardar euro på nedskriving av gresk gjeld.
Kypros søkte i utgangspunktet om eit kriselån på 17,2 milliardar euro i juni 2012.
Først for ei veke sidan gav EU og IMF sitt ja - men berre til 10 milliardar euro, og med krav om at kypriotane sjølv skaffa resten av summen som må til for å berga det skakkjørte bankvesenet.
- LES OGSÅ: Presidenten kuttar løna si
Restriksjonar mot «bank run»
Kypros har i mange år hatt profitt på å trekkja til seg utanlandsk kapital i byte mot låge skattar og hemmeleghald rundt finanstenester.
Dei nye innstrammingane vil truleg bety slutten for Kypros som skatteparadis, ifølgje mange økonomar.
Bankane opna igjen torsdag, etter å ha halde stengt i to veker. Det er no innført grenser for kor mykje pengar folk kan ta ut, for å forhindra det økonomane kallar «bank run» at folk spring til bankane sine og tek ut alt dei har av sparepengar.
Det er dermed maksimalt lov å ta ut 300 euro om dagen. Det er heller ikkje lov å ta med seg meir enn 1000 euro ut av landet og det er innført restriksjonar på bruken av kredittkort i utlandet.
