Storbritannia og Tsjekkia har ikkje slutta seg til avtalen. Den irske regjeringa seier ja, men har også varsla å legge ut finanspakta til folkeavstemming.
Vil la eurobarnet leve
– Det er eit viktig steg på vegen mot å bringe euroen tilbake ifrå utrygt farvatn. Det er ein klar og skarp tekst, sa EU-presidenten Herman Van Rompuy før seremonien.
– La oss gi dette barnet liv, sa presidenten då dei 25 regjeringssjefane signerte avtalen med store smil om munnen.
Straff for å ikkje skjerpe seg
Avtalen er meint å sikre at gjeldskrisa i eurosona ikkje gjentek seg. Den skal føre til økonomisk stabilitet og sørgje for balanserte budsjett.
Land som ikkje skjerpar seg, og ikkje klarer å halde budsjettdisiplinen, risikerer straffetiltak frå Brussel.
Dramatisk toppmøte
Det var Tyskland og Frankrike som i slutten av fjoråret tok initiativ til finanspakta, men på eit dramatisk toppmøte i desember sa britane nei til å delta.
Det er uvisst når irane vil halde den varsla folkeavstemminga. Finanspakta trer i kraft når tolv av dei 17 eurolanda har ratifisert den.
Åtvarar mot å juble for tidleg
Etter at den økonomiske krisa har dominert agendaen i snart to år, anar EU-leiarane lys i enden av tunnelen. Det er likevel for tidleg å slå seg på brystet, åtvarar kjent økonom.
Sony Kapoor, direktør ved tankesmia Re-Define og økonomisk rådgjevar for fleire EU-land, meiner EU-landa ikkje skal gratulere seg sjølve heilt enno.
– I Tyskland, der arbeidsløysa er låg og økonomien sterk, har ein berre eit abstrakt inntrykk av korleis krisa utspelar seg i landa i sør. Dei forstår ikkje panikken i landa som slit, fortel Kapoor til NTB.
Han understreker at landa i Nord-Europa ikkje er immune og viser til at Nederland ifølgje ferske prognosar vil få ein resesjon på 0.9 prosent i år. Same prognose viser at dei 17 eurolanda samla vil oppleve ein økonomisk nedgang på 0.3 prosent, i staden for ein vekst på 0.5 prosent.
At EU no prioriterer vekst og ikkje berre sparetiltak er bra, meiner Kapoor, det kjem berre for seint.
– Dei aggressive budsjettkutta har ført til mykje unødig liding og har skada EU sitt rykte, meiner økonomen.