Visepresident i EU-parlamentet gripen
Belgisk politi har fredag kveld gripe ein av visepresidentane i Europaparlamentet, greske Eva Kaili, melder AFP.
Arrestasjonen skjedde i samband med etterforsking av ei korrupsjonssak der Qatar skal vere innblanda.
Tidlegare på fredag blei også fire andre personar knytt til EU-parlamentet gripne.
Belgisk politi har over tid hatt mistanke om at ein golfstat har forsøkt å påverke EU-parlamentet, blant anna ved å gi gåver og pengar til personar i sentrale posisjonar.
Påtalemakta seier etterforskinga fokuserer på ein mogeleg kriminell organisasjon og påstandar om korrupsjon og kvitvasking. I samband med raida er det teke beslag i 600.000 euro i kontantar, i tillegg til PC-ar og mobiltelefonar.