Av
Bent J. Tandstad
Det var tidleg i dag at det vart skote mot bilen til diplomaten frå Bahrain, Hassan al-Ansari, då han var på veg til jobb. Han vart treft i handa av eitt skot, og er ikkje alvorleg skadd, blir det opplyst frå sjukehuset.
|
Den bahrainske deiplomaten vart skoten medan han sat i denne bilen i Bagdad i dag tidleg. (Foto: Reuters/Scanpix) |
Nyheitsbyrået Reuters melder at det var minst åtte menn som opna eld mot diplomaten sin bil i den velståande bydelen Mansour i Bagdad.
Bortføring
Augevitne fortel at det verka som om angriparane først hadde tenkt å bortføre mannen. Dei prøvde å få han til å forlate bilen, men Ansari berre køyrde vidare. Det vart det skote mot han.
I ettermiddag vart det skote mot ei gruppe køyrety tilhøyrande den pakistanske ambassaden i Bagdad i same bydelen i Bagdad. Ingen vart skadd i skytinga.
Sist laurdag vart den egyptiske utsendinga til Irak bortført i Bagdad, også det i bydelen Mansour, og han er framleis sakna. Dei som stod bak bortføringa har ikkje gitt lyd frå seg.
Desse tre hendingane kan vere del av ein ny taktikk frå opprørsstyrkane i Irak, der målet er å ramme utsendingar frå andre muslimske land som støttar det nye regimet i Irak.
Dette kan føre til at land som i utgangspunktet støttar det nye regimet kan bli skremde frå å sende diplomatar til Irak.
Nye angrep
Samstundes held angrepa mot menneske som arbeider for dei nye irakiske styresmaktene fram. I dag tidleg vart fire kvinnelege tilsette ved flyplassen i Bagdad skotne og drepne då dei var på veg til jobb. Tre andre vart såra i angrepet, opplyser ei kjelde i det irakiske innanriksdepartementet til AFP.
Ei bombe eksploderte like utanfor den iranske ambassaden i Bagdad. Målet var ei amerikansk kolonne, og ei sivil vakt vart skadd. Ambassaden vart ikkje skadd i eksplosjonen.