Sri Lanka: To av tre familiar får ikkje nok mat
Meir enn to av tre familiar i Sri Lanka har ikkje nok mat. Det kjem fram i ei undersøking utført av Redd Barna.
– Dei fleste i Sri Lanka slit med å få nok mat på bordet, skaffe bensin på tanken og få tilgang til helsehjelp, seier Redd Barnas direktør på Sri Lanka, Julia Chellappah i ei pressemelding.
Sri Lanka har blitt hardt råka av den høge prisauken på mat og drivstoff, og har hamna i den verste økonomiske krisa i landet si historie.
Drivstoffmangel har ført til at skular i dei store byane har blitt stengde ned. Nedstenginga er blitt forlenga til 10. juli og har gjort at mange barn mistar det eine måltidet dei får på skulen.