Politiet etterforskar alvorleg valdshending

Politiet fekk melding klokka 23 i går om ein person med stikkskadar i nærleiken av Slependen stasjon i Bærum.

Den fornærma var medviten, men skal ha vore alvorleg skada. Han er no utanfor livsfare.

Hendinga blir etterforska som eit drapsforsøk, på grunn av dei alvorlege skadane fornærma er påført.

Det er per no ingen som er mistenkt, pågripe eller sikta i saka. Det er òg mogleg at det er fleire som var involverte i hendinga.

– Vi vil gjennomføre avhøyr av fornærma så snart det lar seg gjere. Etterforskinga held fram for fullt for å identifisere gjerningspersonen, eller personane, seier Anne Alræk Solem, leiar for drapsseksjonen i Oslo-politiet.

Politiet meiner at åstaden er ei leilegheit i Bærum, der dei i natt har drive etterforsking.

Ifølgje Solem har politiet opplysningar som tyder på at det har vore eit forløp til hendinga.

– Vi forstår at folk blir opprørt når det skjer slike ting i nærområdet, men ut ifrå opplysningane vi har no er det ikkje noko som seier at det skal vere fare for andre, seier Solem.

Politiet har gjort kriminaltekniske undersøkingar på åstaden, avhøyrt vitne og henta inn videomateriale frå området.

Solem kan ikkje seie om dei har funne noko våpen, eller teke andre beslag, i saka til no.