Politiadvokat om Oslo-skytinga: – Viktig å undersøke om det er medverkarar

Politiet heldt fredag ettermiddag pressebrief om den siste utviklinga i etterforskinga av skytinga i Oslo natt til laurdag.

– Det er viktig for oss å undersøke om det er medverkarar. Det er viktig å avdekke om det kan ha vore fleire involverte, men på noverande tidspunkt er det ikkje opplysningar vi kan gå ut med, opplyser politiadvokat Ingvild Myrold til NRK.

Den terrorsikta Zaniar Matapour (43) ynskjer framleis ikkje å la seg avhøyre. Tre rettspsykiatriske sakkunnige skal observere den sikta, for å kome fram til om han er strafferettsleg tilrekneleg.

Politiet har motteke totalt 160 tips etter at dei offentleggjorde nye overvakingsbilete av den sikta.

– Vi ynskjer framleis tips om den sikta. I og med at han brukar si nekt til å forklare seg, ynskjer vi å få vite all informasjon om den sikta, seier politiadvokaten til NRK.