Kongen tilbake på jobb

Kong Harald er tilbake på jobb etter at han fredag blei sjukmeld fordi han var forkjølt. Måndag tok han og kronprinsen imot den serbiske presidenten Aleksandar Vucic på slottet. Den serbiske presidenten er på offisielt besøk i Noreg denne veka.

Måndag har Vucic hatt møte med stortingspresident Masud Gharahkhani og statsminister Jonas Gahr Støre. På kvelden skal han ete middag med norske energiaktørar. Tysdag reiser han til Trondheim. Der skal han blant anna besøke NTNU og Sintef for å få innføring i arbeidet deira med fornybare energiløysingar.