Irakisk skodespelar saksøker britisk magasin etter bildebruk

I det britiske magasinet Economist blir eit bilde av den irakiske skodespelaren Enas Taleb brukt som illustrasjon i ein artikkel med tittelen «Kvifor kvinner er tjukkare enn menn i den arabiske verda».

I artikkelen argumenterer magasinet for at sosiale restriksjonar i den arabiske delen av verda gjer at kvinner held seg unna arbeid og fysisk trening.

Taleb har no gått til søksmål mot magasinet. Ho krev økonomisk kompensasjon og at magasinet ber om orsak. Ho meiner også at bilde er blitt manipulert, skriv BBC.

– Bildet mitt blei brukt i ein kontekst som var støytande for kvinner, seier Taleb, ifølge nyheitsbyrået AFP.