Kai Aage Pedersen

Åge Starheim kan bli første Frp-representant frå Sogn og Fjordane.(Foto: NRK)

Tidlegare har partiet tapt valet på målstreken, fordi veljarane i fjordfylket ofte går tilbake til partiet dei har røysta på tidlegare,når alvoret melder seg.

I Høgre vart stortingsrepresentant Sverre Hoddevik vraka som listetopp under nominasjonen til fordel for Mathias Råheim frå Gaular.
Spørsmålet er om Råheim er pirrande nok for folk i Sogn og Fjordane, eller om høgresida i fylket vil støtta Framstegspartiet.

SV i støtet

Heidi Grande Røys (SV) frå Florø gjorde eit godt val sist etter mobilisering på kysten. Partiet har godt drag i dei nasjonale meiningsmålingane, og kanskje er dette nok til å gi Heidi Grande Røys fornya tillit på Stortinget.

Liv Signe Navarsete (Sp) går mot ein sikker plass på Storinget. Det same gjeld Reidar Sandal som toppar lista til Arbeiderpartiet. Bak han kjem Ingrid Heggø frå Høyanger som kan bli mandat nummer to for Arbeidapartiet viss det går bra i valkampen. Heggø fekk andreplassen på lista etter tøff nominasjonsstrid. Utfordringa hennar blir å overtyda folk, spesielt i Indre Sogn, om at ho er ein politikar som også kan tala deira sak, slik at ikkje indresogningane hentar fram Senterpartiet og Liv Signe Navarsete når dei skal røysta.

Utrygt for KrF

Per Steinar Osmundsnes (KrF) vann kampen mot Trude Brosvik i nominasjonen, men er ikkje sikker på fornya tillit på Stortinget. KrF må kjempa mot Ap og Senterpartiet som begge har von om to mandat, og i tillegg SV, Høgre og Framstegspartiet som vil setja alt inn på å sikra seg plass på Stortinget.

Og som utsidar kan til dømes Venstre komma som troll av ei øskje. Ikkje som utfordrar til mandat på vanleg vis, men som utjamningsmandat. Viss Venstre kvalifiserer seg til eit slikt mandat, og dette hamnar i Sogn og Fjordane, kan det altså bli ordføraren i Eid, Gunvald Ludvigsen, som trekkjer det lengste strået, og blir Sogn og Fjordane sin femte stortingsrepresentant den neste fireårsperioden.