Her går verdsarva opp i flammar

I 128 år har gravkammeret Kasubi stått utanfor hovedstaden Kampala. Fire bagandakongar er gravlagde der. Natt til onsdag brann turistattraksjonen ned, og verdsarvlista til FN vart eitt namn kortare.

Presidenten ikkje velkommen

Då presidenten i landet, Yoweri Museveni, ville besøke branntomta og sjå på skadane, vart to personar drepne i opptøyar. Demonstrantar bua på presidenten og sette opp barrikader for å halde han vekke.

Tryggingsstyrkar opna eld mot dei. To personar vart drepne og fem vart skadde, ifølgje myndigheitene.

Brannvesenet vart hindra i å nå fram til brannen av opptøyane som starta samtidig som brannen. Tre brannbilar vart øydelagde og ein brannmann vart skadd. Det er framleis usikkert korleis brannen starta, men politiet etterforskar saka.

- Merkeleg brann

- Dette er ein merkeleg brann, når ein ser kva bagandafolket har vore gjennom, seier Peter Mayiga, ein talsmann for Buganda.

Myndigheitene avviser at dei har noko med brannen å gjere.

- Dette er fullstendig feil. Regjeringa kan umogleg vere ansvarlege for denne brannen, seier generalmajor Kale Kayhuri til nyheitsbyrået AFP

Gravkammeret kom på verdsarvlista i 2001. Det har blitt brukt som åndeleg symbol for bagandafolket.