Funnen i live etter 17 dagar

I Kina er ein mann som prøvde å hjelpa folk etter eit jordskjelv funne i live etter 17 dagar. Minst 93 menneske mista livet i jordskjelvet i Sichuan-provinsen tidlegare i september.

Mannen jobba ved eit vasskraftverk, og blei verande att under evakueringa for å hjelpa skadde kollegaer, melder statleg kinesisk radio.

Då han prøvde å koma seg vekk gjekk han seg vill, fordi han hadde mista brillene sine i jordskjelvet.

Denne veka blei mannen funnen i live av ein lokal bonde, eit par mil unna kraftverket.