Fleire meir nøgde med helsetenester
Fleire er fornøgde med helsetenester som fastlege og sjukeheimar, og tilfredsheita med Nav er på sitt høgaste nivå nokosinne, viser Innbyggerundersøkelsen 2021.
– I sum kan vi seie at innbyggjarane har vorte meir fornøgde med helsetenester, men mindre fornøgde med utdanningstenester. Likevel er tilfredsheita med både det statlege og kommunale tenestetilbodet jamt over høgt, samanfattar Direktoratet for forvaltning og økonomistyring, som står bak undersøkinga.
Tilfredsheita aukar for kommunale helsetenester, politi, forsvar og sjukehus, men går ned for universitet og høgskular.
Grunnskulen gjer det markant dårlegare enn før, men her oppgir dei som ikkje har barn i grunnskulen, at dei er mindre tilfredse enn dei som har barn der.