Finland stoppar Moderna-vaksinering
Myndigheiter i Finland har mellombels stansa vaksineringa med Moderna for menn fødde i 1991 eller seinare, skriv nyheitsbyrået Reuters.
Onsdag valde svenske helsemyndigheiter å stansa vaksineringa av Moderna for personar fødde i 1991 og seinare. Også Danmark vil pausa Moderna-vaksineringa for alle ungdommar og born.
Årsaka er at vaksinen i sjeldne tilfelle kan gi betennelse i hjartemuskelen eller hjarteposen.
Sidan tilstanden er vanlegast blant unge menn, har myndigheitene for sikkerheits skuld valt å ta vaksinen ut av bruk blant personar under 30 år.
Per 5. oktober 2021 har Legemiddelverket fått 268 meldingar om betennelse i hjarta blant norske vaksinerte.
FHI gav onsdag anbefaling om at unge menn bør velja Pfizer når dei skal vaksinerast.
– Vi understrekar difor igjen vår anbefaling om at ungdommar under 18 år som skal vaksinerast får tilbod om Comirnaty uansett kva for ein mRNA-vaksine dei fekk som første dose. Menn under 30 år bør også vurdera å velja Comirnaty når dei skal vaksinera seg, sa Geir Bukholm, smitteverndirektør ved Folkehelseinstituttet.
