Av
Jenny Duesund og
Inger Johanne Sæterbakk
- Det er mogleg for kapteinen å unngå straff i Norge, dersom han får dom for dei samme forholda i Russland, seier Ole Kristian Fauchald, førsteamanuensis ved Institutt for offentleg rett ved Universitetet i Oslo. Norsk rett tillèt ikkje at kapteinen blir tiltala for eit forhold han tidlegare er dømd for etter russisk rett.
|
Politimeister Truls Fyhn. Foto: NRK |
Norsk politi overraska
- Vi legg inga vekt på det russarane måtte gjere i denne saka, seier politimeister i Troms politidistrikt, Truls Fyhn. Han leier den norske etterforskinga. Fyhn er overraska over at kaptein Valerij Jarantsev i dag vart sikta for ulovleg fiske og fridomsrøving. Norsk politi held fram med si etterforsking av saka.
- Vi tar utgangspunkt i at lovbrotet skjedde i vernesona til Svalbard, som er eit område under norsk domsmakt, seier Fyhn.
Etterforsking som planlagt
Dersom russisk domstol ikkje finn kapteinen skuldig i lovbrotet, kan saka bli tatt opp i det norske rettssystemet. Men norsk politi etterforskar saka uavhengig av dette, og legg problematikken om dobbel straff til sides.
- Viss denne saka endar med ein dom i Russland, skal vi vurdere problemet når den tid kjem. No held vi fram i det sporet vi har lagt opp, seier politimeister Truls Fyhn.
Troms politidistrikt ventar no på løyve til å etterforske "Elektron" i Russland.