Danielsens Hotell

J. A. Foss.

Seinare overtok handelsmann J. A. Foss landhandelen og gjestgiveriet, og hadde brennevinsskjenking. Denne Foss var ein av skiparane av Sogndal Sparebank i 1841, og ein mektig mann i bygda. Etter han overtok bergensaren Kvammen eigedomane og dreiv til ut på 1880-talet, då Daniel Danielsen overtok.

Starta med 10 senger

Daniel Danielsen kom frå Bryggja i Nordfjord, og gifta seg med ei syster til Nils Landmark Lem som var lensmann i Sogndal frå 1879 til 1916.

Gjestgiveriet på Fossetunet i 1860. (Foto © Fylkesarkivet)

Danielsen kjøpte den gamle bygningen i Fossetunet og starta hotell med 10 senger. Dette må ha vore kring 1890. Hotellet var då eit vakkert hus på to etasjar og med høgt, valma pannetak - svært likt den kjende sorenskrivargarden på Loftesnes.

Billett for å sjå på "dampen" i Sogndal

I tillegg til hotelldrifta, var Daniel Danielsen dampskipsekspeditør og handelsmann, og i 1893 bygde han det første meieriet i Sogndal - sjå: Meierihistoria i Sogndal. Folk som ville ned på kaia for å glo på "dampen" måtte løyse ei avgift på 5 øre for å sleppe gjennom den låsta grinda som Danielsen hadde bygt i kaibakken!

Storfine gjester

Mellom dei som tok inn på hotellet, var lordar og hertugar som fiska laks i Årøy. Her budde også indiske maharajaer, hertugen av Windsor og Bjørnstjerne Bjørnson.

Slekta overtek

I 1909 fekk Daniel Danielsen hjelp av syskenbarnet Oscar Danielsen frå Bergen. Han gifta seg med kjøpmannsdottera Berta Olsen, og då grunnleggjaren døydde i 1921, overtok dei både hotellet og dei andre verksemdene. Oscar døydde i 1944, og Berta dreiv åleine fram til 1964, då dottera Anne Margrete Olsen og hennar ektemake Magne Hovland overtok.
I 1971 vart Danielsen Hotell rive for å gje plass til A/S Forretningsbygg.