Ferdsla på fjorden i Vik

Jektebygda Vangsnes

Vangsnes var det viktigaste senteret for jektefart i Sogn. I 1890 vart det talt 17 jekter i bygda.

Vik bygde kommunal kai

Vik kom med som stoppestad for dei første Fylkesbaatrutene i 1858, og første ekspeditør var Chr. Rasmussen. Det vanlegaste var at private ekspeditørar bygde kaia, men i Vik bygde kommunen dampskipskai i 1864.

Billett for å sjå dampbåten i Vik

Vikjene måtte betale for å få lov å stå på kaia når "dampen" kom. Dessutan vart det forbod mot dans på kaia.

Fylkeskaia stengd for konkurrentane

Frå 1866 fekk Fylkesbaatane hard konkurranse på Sognerutene frå andre dampskipsselskap.

Fylket kjøper Hopstock-kaia

I 1898 vedtok fylkestinget å kjøpe kaia til hotelleigar og handelsmann Jens Krogh Hopstock, og ved denne kaia var det berre fylkesbaatar som fekk leggje til.
Dampskipsekspeditør Hopstock plikta seg skriftleg til å avvise dampskipet "Ørnen" dersom det konkurrerarande ruteskipet freista å leggje til (sjå "Konkurranse om rutefarten" og "Ulukker i Lærdal").

Fresvik

kom med som stoppestad på dei aller første rutene som Fylkesbaatane starta mellom Bergen og Sogn i 1858. Fresvik hadde frå 1971 til 1976 anløp av ekspressbåtruta Bergen-Sogn, men fekk på 1990-talet snøggbåtsamband att ved at lokalruta som Fylkesbaatane sette opp mellom Aurland og Sogndal gjekk innom Fresvik.

Nese i Arnafjord

fekk rutestopp av Fylkesbaatane ein gong i månaden frå 1862, men fall ut av rutene etter ei tid. Først i 1882 kom bygdene inn att på dampbåtrutene, og hadde kring 1900 tre stopp i veka.

Vangsnes

fekk rutestopp av Fylkesbaatane i 1877, og Lars L. Vangsnes var ekspeditør og postmann.
Den første ferja som gjekk til Vangsnes, var ferjeruta som frå 1945 vart sett opp mellom Nordeide i Høyanger og Leikanger.

Ferjesambandet Vangsnes-Grinde-Balestrand

vart opna i 1952, men før den tid hadde også ferja som gjekk mellom Vetlefjorden og Grinde i Leikanger før vegen til Balestrand var ferdig, nokre daglege turar over fjorden til Vangsnes.

Ferjesambandet Vangsnes-Dragsvik-Hella

vart opna i 1956 då vegen frå Grinde til Hella var ferdig. Same året opna Vik-Voss-vegen (Vikafjellsvegen), og trafikken auka sterkt.

Vangsnes ferjekai 1966

Feios

fekk rutestopp av Fylkesbaatane i 1877, og handelsmann Kristen Offerdal vart ekspeditør og bygde kai.

Sylvarnes

fekk rutestopp av Fylkesbaatane i 1890.

Faste ruter med D/S "Vangsnes"

Johannes J. Vangsnes frå Fresvik starta i 1903 faste ruter mellom Bergen og Sogn med D/S "Vangsnes". Johannes døydde i 1913, og sonen Nils J. Vangsnes overtok.

Mannskap på D/S "Vangsnes". F.v.: styrmann Kristian Vangsnes, fyrbøtar Sigurd Bøthun, kokk Ellend Vangsnes, maskinist Ragnvald Hauglum Vangsnes og skippar Nils J. Vangsnes. (Foto © Fylkesarkivet)

Framfjorden

fekk stoppestad for Fylkesbaatane i 1908 i samband med at selskapet Mineral og Kraft AS starta kalkgruve der (sjå "Talkgruvene i Framfjorden").

Finden

kom i 1924 inn på ruta til ei lokal motorbåtrute som Fylkesbaatane dreiv i fjorden mellom Lavik og Fjærland.

Strid om Bergens-rutene

Passasjerskipet "Balholm" sette Fylkesbaatane i rute mellom Høyanger-Vik-Balestrand-Leikanger-Flåm i 1949. Same året sette selskapet "Sognefjord" og "Sunnfjord" inn i rutene på Bergen.

Ekspressbåten

mellom Sogn og Bergen starta i 1971, og Vangsnes kom med på ruta frå første dag. Ei tid var også Fresvik med på ekspressbåtruta (sjå Fresvik lenger oppe). Rutestopp i Vik vart nokre år sløyfa, men kom med att frå 1998.

Skyssbåtar

Peder Kvamme var den mest kjende skyssbåtføraren. Han dreiv frå slutten av 1920-talet skysstrafikk med fire båtar: "Tommeliten", "Solo", "Ramona" og "Bolinder". Den siste vart under 2. verdskrig nytta som slepebåt for lekterar på Årdalsvatnet under Nordag-utbygginga (sjå "Tyskarane satsar på Årdal").
Den siste som dreiv passasjerbåt i Vik var Herman Vikøren med båten "Solveig", som var i drift til 1970-talet.

"Sylvarnes" til veglause grender

Ei lokal båtrute med fraktebåten "Sylvarnes" har dei siste åra utført vare- og passasjertransporten frå Vik og vestover til dei veglause grendene på sørsida av Sognefjorden.

Ekspressbåten

mellom Bergen og Sogn har daglege anløp måndag-fredag til Vik.

Sjå også:
· Ferdsla på Sognefjorden