Færre representantar

Møre og Romsdal har til no hatt 10 representantar på Stortinget. Etter den nye valordninga får fylket berre ni (åtte distriktsmandat og eitt utjamningsmandat). Denne ordninga blei vedteken i 2003, og målet var å få ei meir rettferdig fordeling av mandata mellom fylka. Samstundes er talet på stortingsrepresentantar auka frå 165 til 169.


Nyordninga tek omsyn både til folketal og areal. Framleis vil kvar representant frå eit fylke med lågt innbyggjartal ha færre stemmer bak seg enn ein representant frå eit folkerikt fylke, men skilnaden er blitt noko mindre. Fylke som Rogaland, Oslo og Akershus har fått fleire stortingsmandat, men det har også Finnmark og Troms!

Eitt utjamningsmandat i kvart fylke

Meininga med utjamningsmandata er å rette opp den skeivfordelinga som mandatfordelinga i kvart fylke kan føre til når ein vurderer dei samla røystetala for heile landet. Etter den gamle ordninga var 157 av dei 165 stortingsmandata fordelte på fylka og resten på underrepresenterte parti. Dermed kunne talet på representantar frå eit fylke variere frå val til val.

Ved stortingsvalet i år skal kvart fylke ha eitt utjamningsmandat. Utjamningsmandata blir utrekna på grunnlag av det samla røystetalet til partia.

Meir om den nye valordninga finn du på valforskar Bernt Aardals heimeside