Aalesunds Fotballklubb har sparka trenar Ivar Morten Normark. I kveld er partane blitt samde om å avslutte kontrakten.
Av
Arne Flatin og
Ivar Eidheim.
|
Ivar Morten Normark. Foto: Alf-Jørgen Tyssing, NRK |
Først godtok ikkje Normark oppseiinga etter han i sommar skreiv under ein ny treårskontrakt for klubben.
Normark engasjerte advokat gjennom trenarforbundet. I formiddag sa han at han ville halde fram med å møte på jobb og at han framleis såg på seg sjølv som trenar for AaFK.
Takka
Etter eit tre timar langt møte i kveld kunne partane litt før klokka 19 fortelje at dei hadde blitt samde om å avslutte kontrakten.
Etter møtet nytta Normark høvet til å takke for fem år i AaFK som han har sett umåteleg pris på.
Overraska
Normark har vore trenar for AaFK dei siste fem sesongane, og er overraska over at han fekk sparken.
– Eg såg ikkje det kome, eg blei ganske overraska, sa han i formiddag og viste til at han akkurat hadde byrja i den nye kontrakten.
Fleirtal blant spelarane
NRK snakka med fleire av AaFK sine spelarar i dag. Eirik Hoseth sit i spelarutvalet saman med Christian Steen og Peter Werni. Hoseth seier at det var eit klart fleirtal av spelarane som ønskte ny trenar.
Hoseth seier også at dette er ein trist dag på mange måtar og understrekar at Normark har gjort veldig mykje bra for klubben.
Normark vil ikkje svare på kva han synest om at han har så klar mistillit i spelargruppa.
– Det har eg ingen kommentar til, sa han i formiddag.
Forhandlingsmøtet
Styreleiar i AaFK, Arne Aambakk, sa i kveld at det aldri var aktuelt å gå tilbake på avgjerda om å seie opp Normark. Forhandlingsmøtet i kveld handla berre om å finne ei konstruktiv løysing, seier han.
Veit ikkje kva han skal gjere
Bodø/Glimt har bestemt seg for å skaffe ny trenar. Normark har spelt for klubben tidlegare og vore knyta opp mot fleire gonger, men det ofra ikkje Normark ein tanke i dag.
– Nei, eg har meir enn nok her i Ålesund å tenkje på no om eg ikkje skal tenkje på andre klubbar også, sa Normark i formiddag.
Heller ikkje i kveld, etter at kontrakten er oppheva, ville han seie noko om kva han skal gjere framover.