Aalesunds Fotballklubb får ein tøff jobb i skjebnekampen mot Stabæk på Nadderud stadion søndag. Midtbanespelar Frode Fagermo seier kampen blir ei utfordring for spelarane.
Mykje står på spel
Det står veldig mykje på spel i kampen mot Stabæk, seier Fagermo, men han trur ikkje spelarane får panikk i ein så viktig kamp.
Stabæk ligg på tredjeplass i tippeligaen og er med i kampen om sølvet, medan Aalesund slåst for å unngå nedrykk.
Fagermo meiner AaFK etterkvart har fått god erfaring med å spele viktige kampar.
To formlag
Stabæk er i svært god form og slo sensasjonelt Rosenborg heile 6-1 på Lerkendal i siste serierunde, men det er fullt mogleg å slå Stabæk, trur Fagermo. Det er jo ein viss sjanse for at Stabæk er høgt oppe etter sigeren mot Rosenborg, og at laget derfor undervurderer AaFK, seier midtbaneslitaren. Mest sannsynleg er Stabæk skjerpa fordi laget må slå AaFK for å halde seg i sølvkampen, trur Fagermo.
Men det er to lag i medgang som møter kvarandre på Nadderud. AaFK har tre sigrar og ein uavgjort på dei siste fem kampane.
AaFK spelte uavgjort 1-1 mot Molde sist helg etter at Molde utlikna tre minutt på overtid. Det var nettopp Frode Fagermo som scora målet for AaFK på straffespark.
Kontringsfotball
I oppgjeret mellom Molde og Stabæk i vår blei det resultat og uavgjort 1-1 medan AaFK vann cupkampen mot Stabæk 4-2.
Og nettopp i cupkampen brukte AaFK ein resept som var effektiv, seier Fagermo: Effektiv kontringsfotball med hurtige Morten Moldskred på topp.
Fagermo trekkjer og ein parallell til kampen mot Bodø-Glimt som AaFK slo 2-0. Glimt var ein klar sølv-favoritt, men AaFK spelte defensivt og kompakt og fekk Glimt ut av spillestilen. Fagermo trur dette og blir resepten mot Stabæk på Nadderud