Med hjelp frå lyttarane og Morten Schakenda gir Mindor Klauset og Odd Sørås gode tips om bollar.
Denne gongen har vi med oss meisterbakaren Morten Schakenda frå Gjerdsvika i Sande, som har gjort lomvær av seg - han driv bakeri i Lom. Klikk på lydlenkja ovanfor og høyr programmet!
Aukrabollar
Bjørg Hukkelberg frå Aukra fekk ei kokebok av bestemora då ho gifta seg, og ei oppskrift på kveitebollar (fastelavnsbollar) er blitt svært populær, ikkje berre i familien hennar. For via barnehagen der Bjørg arbeider har oppskrifta spreidd seg til heile Aukra, ja endå lenger.
Grunnoppskrifta:
1/2 kg kveitemjøl
100 g smelta margarin
3 dl mjølk
1 pk gjær
1 dl sukker
1 ts kardemomme
1 egg
Steikjetemperatur: 250 grader.
Bjørg må alltid lage meir enn dette, så ho startar med 2 kg kveitemjøl og aukar dei andre ingrediensane tilsvarande. Attåt den eine gjærpakka brukar ho då ein pose tørrgjær, men framleis berre eitt egg. Desse bollane blir alltid lette og fine, sjølv om dei ligg eit par dagar.
Solveig Nytun har like stor suksess i familien med sine bollar. Det spesielle ved denne oppskrifta er at bollane ikkje inneheld kardemomme, men kanel. Her kallar vi dei
Kveitebollar med kanel
50 g gjær
1/2 ts salt
1 3/4 dl sukker
5 dl mjølk
14 dl kveitemjøl
150 g smør eller margarin
1/4 ts kanel
2 dl rosiner
2 egg
Rør ut gjæra, saltet og 1 ts sukker. Tilsett mjølka som du har lunka og arbeid inn 1/3 av mjølet. La det stå lunt og tildekt i ca. 20 minutt. Så tilset du smelta smør etter at du har avkjølt det og har oppi resten av sukkeret og mjølet + kanelen, rosinane og egga. Set deigen til heving i ein time før utbaking. Pensle bollane med egg før du steikjer dei ved 250 grader.
Tips andre om denne saken
Utskriftsvennlig versjon