Radioprogrammet Mat med Mindor handlar i februar om supper, og vi starta ferda vår blant desse meir eller mindre tyntflytande delikatessene med å la Marie Lovis Widnes syngje si eiga "Brennsnutvise" - høyr programmet via lydlenkja ovanfor. Brennsnut - eit namn på kjøtsuppe som er svært utbreidd i vårt fylke - blir kanskje ein gjennomgangsmelodi i matprogrammet onsdag kl. 1130 i vekene framover.
 |
| Sørås og Klauset: sjølve Supperådet i aksjon... |
Oppskriftene på brennsnut varierer, og vi skal vente med den fullstendige oppskrifta, men namnet brennsnut blir brukt mange stader i fylket på ei suppe av kjøt, erter og andre grønsaker. Særleg før i tida brukte mange byggryn i brennsnuten. Oddbjørg Blindheim ringjer oss og fortel at ho brukar havregryn; det gir god smak og gjer brennsnuten fyldig. I hennar barndom brukte dei også å ha i suppa små ballar av egg, mjølk, mjøl og litegrann sukker.
Sildegryn
minnest Oddlaug Gjelsten frå Ålesund frå sin barndom under krigen - særleg sildebeina står fast i minnet! Men ho lagar sildegryn endå: legg i vatn byggryn over natta, kokar gryna i lag med eit spekekjøtbein, har nedi mykje potet og grønsaker, og så skjer ho litt utvatna spekesild i små bitar og lar dei trekkje i suppa.
Meir moderne i snittet er nok
Ostesuppa
til Bergljot Sættem frå Bolsøya. I suppevatnet blandar ho kjøtbuljong og grønsakbuljong. Så tilset ho bruna kjøtdeig og fresa purreløk, og lar alt koke ferdig. Oppi dette rører ho krydderost og naturell ost (smøreost) i forholdet 1 l vatn/3 beger ost. Til slutt har ho oppi nokre paprikaterningar og persille, og serverer ferskt brød attåt. Kraftige saker!
Til slutt eit tips om
Fiskesuppe:
Åshild Rusten frå Molde lagar fiskesuppe på kraft frå sei, som ho synest gir best smak. Ho kokar krafta på uggar og "ørnemølen" - det stykket som er oppå, nærast hovudet. Sjølve suppa lagar ho utan fisk, ho lagar mjøljamning, sper krafta med mjølk og har raspa gulrot, hakka løk og rømme oppi.
Mange fleire tips får du i programmet frå 5. januar 2005 som du kan høyre via lydlenkja ovanfor.
Tips andre om denne saken
Utskriftsvennlig versjon