Klippfiskeksperten Knut Garshol i Kristiansund fortel om korleis han lagar bolinhos. Høyr elles om langfredagserter og sukkertining av frosenfisk!
I "Mat med Mindor" 21. april
fortalde Roar Helseth frå Fræna om ein spesiell måte å tine frosne fiskefiletar på:
Strø filetane med ei blanding av like delar salt og sukker og la dei tine sakte, gjerne over natta. Resultatet blir meir likt ferskfisk enn ved vanleg tining, og det blir ingen søtsmak av fisken!
*****
Elles snakka Elisabeth Olsen frå Harøysundet om kvitlaks, også kalla vass-sild, som er ein framifrå fisk til å lage fiskemat av.
*****
Og Jorunn Skjørsæter frå Torvikbukt presenterte ein tradisjonell påskerett i hennar familie: langfredagserter. Klikk på lydlenkja ovanfor og del matgleda med innringjarane!
Her skal vi gjengi den oppskrifta på klippfiskbollar som Knut Garshol i Kristiansund presenterte i programmet. Garshol driv klippfiskbutikk i Kristiansund og er ein av våre fremste ekspertar på denne edle vara.
Garshols bolinhos
400 g klippfisk - bør vere rå og ikkje laga av frosenfisk
400 g kokt, kald potet (helst Beatepotet)
Ein middels løk (ca. 100 g)
(Dersom råvara er frosenfisk tilset du 1 egg)
2 fedd kvitløk som du mosar
1 knivsodd spansk pepar
Bland dette i ei matmølle (food processor). La farsen stå og kvile ein times tid - då esar han opp og blir mykje smidigare.
Lag bollar, dypp dei i piska egg og rull dei i strøkavring. Steik dei med god varme i frityrsteikjaren. Garshol synest resultatet blir best dersom ein først halvsteikjer dei i frityr og så tar resten av steikinga i panne eller omn like før servering. Då har ein betre kontroll med prosessen. Ein kan også fryse ned klippfiskbollane etter at dei er halvsteikte.