Streikefaren over for lastebilsjåførar
Lastebilsjåførane får 6,30 kroner i auka timelønn etter at sjåførane og lastebileigarane kom til semje etter mekling to timar på overtid i natt.
Dermed er faren for streik over for dei over 1000 lastebilsjåførane som er omfatta av godsbilavtalen og transportovereinskomsten. Ein streik ville ramma køyring av mellom anna mjøl, gass, glas og betong, og dessutan utkøyring av varer til butikkar.
Resultatet skal ut på uravstemming i Yrkestrafikkforbundet og Fellesforbundet med frist 12. november.
70 millionar har førehandsstemt
Over 70 millionar har førehandsstemt i USA, ei veke føre presidentvalet 3. november. Nær 47 millionar har stemt via post og 23 millionar har levert førehandsstemme, opplyser US Elections Project. Førehandsstemmene utgjer over halvparten av valdeltakinga frå 2016.
Samstundes er det fleire skarpe konfliktar rundt valet i ulike rettsinstansar i landet.
I Texas har høgsteretten avgjort at den republikansk-styrte delstaten kan avgrense talet på stader der veljarar kan levere poststemmer. Talet på stader for mottak av poststemmer er redusert til eitt per fylke, til sterke protestar frå demokratane, som meiner dette hindrar ressurssvake i å bruke stemmeretten.
I Michigan har ein dommar gitt våpenforkjemparar medhald i at dei kan bere skytevåpen synleg i vallokala. Statsadvokat Dana Nessel meiner det kan verke truande på veljarar, og ønskte å forby dette. Ein lågare domstol gav henne medhald, og ho varslar at den nye rettsavgjerda vil bli anka, ifølgje Reuters.
REKORDDELTAKING: Veljarar stod tysdag i timelange køar for å førehandsstemme i Philadelphia i vippestaten Pennsylvania i USA.
Foto: Mark Makela / AFP/NTBUvæpna svarte amerikanarar døyr oftare i politiskytingar
Amerikanske politifolk skyt tre gongar så mange uvæpna svarte amerikanarar som kvite, målt i forhold til kor mange dei er.
Det kjem fram i ein studie offentleggjort i Journal of Epidemiology and Community Health onsdag, om det forskarane kallar ei «krise for folkehelsa».
