Ny statsminister i Australia
Tidlegare denne veka overlevde Australia sin statsminister Malcolm Turnbull ei intern røysting om kven som skulle leie det liberale partiet – og dermed også vere statsminister.
Men uroa i australsk politikk var ikkje over. For tidlegare innanriksminister Peter Dutton, som tapte denne avrøystinga, hadde ikkje gitt opp håpet om å bli statsminister.
I natt norsk tid tok imot Turnbull eit opprop med 43 signaturar der bodskapen var at den sitjande statsministeren måtte gå av.
Like etterpå var det klart for ei ny røysting om partileiarvervet og statsministerjobben.
40 røysta for Turnbull, 45 for å skifte han ut.
Deretter starta kampen om kven som skulle ta over. Her kom faktisk Peter Dutton til kort mot finansminister Scott Morrison. Også her var siffera 45–40.
– Dette er eit ekstraordinært resultat, gitt hendingane sist veke leia av Dutton og den konservative fløya, skriv avisa The Sydney Morning Herald.
Men Dutton har lova å vere lojal mot den nye statsministeren.
Fleire arresterte etter skyteepisode
Politiet har arrestert fleire personar etter skyteepisoden på Sagene i Oslo torsdag kveld. Det opplyste dei klokka 01.10 i natt.
Alle dei arresterte er menn i 20-åra, men politiet kan ikkje opplyse kor mange personar det er snakk om.
– Vi driv med avhøyr og taktisk etterforsking for å få avklara rollene deira i det som er skjedd. Når alle avhøyr er gjennomførte skal vi ta ei ny vurdering av om nokon skal lauslatast eller ikkje, kommenterer fungerande kriminalvaktleiar Øyvind Myhr.
Det var klokka 18.37 politiet fekk inn meldingar om skot i Arendalsgata og Grimstadgata på Sagene. Først vart to personar arresterte, men fleire vart altså tekne etter kvart.
Det er ikkje meldt om personskadar i høve skyteepisoden.
Lynyrd Skynyrd-gitarist er død
Ed King, kjent som gitarist i den amerikanske bandet Lynyrd Skynyrd, er død. Han døydde i heimen sin i Nashville onsdag. Dødsårsaka skal vere kreft.
– Ed var vår bror og ein fantastisk låtskrivar og gitarist, seier Gary Rossington i bandet.
King skreiv saman med to andre i bandet monsterhiten «Sweet Home Alabama».
Han vart medlem i bandet i 1972 og var med i tre år. I 1987 vende King tilbake og vart med bandet fram til 1996. Han var først og fremst gitarist, men var også ein periode bassist i sørstatsbandet.
Lynyrd Skynyrd vart i utgangspunktet nedlagt då tre av bandmedlemmane døydde under ei flyulykke i 1977. Ti år seinare gjorde dei comeback.
Bandet held det gåande den dag i dag, sjølv om Gary Rossington er einaste originalmedlem.