Vann kampen om statsministerjobben
Malcolm Turnbull held fram som statsminister i Australia. Han vart utfordra av innanriksminister Peter Dutton, som også høyrer til den liberale partiet.
Men med 48 mot 35 røyster under eit partimøte er det klart at Turnbull held fram i si gjerning, melder NTB.
Det var Turnbull som sjølv hadde stilt plassen sin til disposisjon, etter at det i fleire veker hadde blitt spekulert i om leiarvervet og dermed også jobben som statsminister var trua.
Miljøminister Josh Frydenberg hadde på førehand åtvara mot å kaste Malcolm Turnbull, ettersom det ville ha skapt frustrasjon blant veljarane.
Om Dutton hadde blitt valt hadde han blitt den sjette leiaren i det liberale partiet på 11 år.
I 2015 var det Turnbull som sjølv danka ut partifellen Tony Abbott.
Som i til dømes Storbritannia er det slik at statsministeren ikkje er direkte valt av folket, men kjem frå partiet eller koalisjonen som har majoriteten i parlamentet.
Sikta for drap på kone og born
I Colorado i USA er 33 år gamle Christopher Watts sikta for drap på si gravide kone og sine to døtrer på fire og tre år.
Ifølgje BBC skal Watts ha påstått at det var kona hans, 34 år gamle Shanann Watts, som først prøvde å kvele dei to døtrene deira, etter at Christopher skal ha fortalt at han ønskte å separere seg frå kona.
I raseri skal Christopher ha drepe kona si. Den døde kroppen hennar vart funne i ei grav nær ein oljetank, ikkje langt frå der mannen hennar hadde jobba. Ho var gravid på 15. veka.
Seinare vart kroppane til døtrene Bella og Celeste oppdaga ikkje langt frå grava til mora.
Formelt er Christopher Watts sikta for ni lovbrot, inkludert tre overlagde drap.
Det er førebels ikkje kjent korleis Watts stiller seg til straffeskuld. Det skal vere ei høyring i saka tysdag.
The Eagles passerte Michael Jackson
Det klassiske Michael Jackson-albumet «Thriller» frå 1982 er ikkje lenger det mestseljande i USA gjennom tidene.
The Eagles sitt «Their Greatest Hits 1971-1975» har nemleg gått forbi med sine 38 millionar selde eksemplar sidan utgjevinga i 1976.
Same år kom The Eagles ut med eit nytt album, «Hotel California», som ligg på tredjeplass på denne lista med 26 millionar selde plater.
The Eagles vart stifta i 1971 og gav seg i 1980. Men i 1994 starta dei opp igjen. I 2016 døydde ein av grunnleggjarane, Glenn Frey. Men no er bandet tilbake på vegen med mellom andre Glenn sin son Deacon i rekkjene.
PS. Sjølv om Thriller ikkje lenger er det mestseljande albumet i USA, toppar det framleis på verdsbasis, ifølgje Wikipedia.