Stuorra beroštupmi Marakatt-Labba čájáhussii
23.355 olbmo leat juo guovtti vahkus fitnan Nationálamuseas Oslos geahččamin Britta Marakatt-Labba dáiddačájáhusa «Bastilis sákkaldagat».
– Dát lea erenoamáš buorre go diehtit ahte dáiddačájáhus lea leamaš oaidnin láhkai dušše guokte vahku, čilge musea diehtojuohkinráđđeaddi Simen Helsvig.
Buohtastahttin dihte sáhttá namuhit ahte Harriet Backer -čájáhusa gallededje badjelaš 100.000 olbmo, dan golmma mánus go čájáhus lei oaidnin láhkai Nationálamuseas skábman.
Backer lea dál Norgga beakkáneamos govvadáiddár.
– Sullii 40.000 olbmo gallededje Backer čájáhusa vuosttas mánu go čájáhus lei oaidnimis. Dien logu vuođul diehtit maid dalle ahte Marakatt-Labba čájáhus geasuha olu olbmuid, lohká Helsvig.
«Bastilis sákkaldagat» čájáhus lea dán rádjai stuorámus čájáhus, mii lea ráhkaduvvon Britta Marakatt-Labba dáidagiin, ja čájeha earret eará tekstiilla, grafihka, installašuvnnaid ja bácciid su viiddis barggus.
Čájáhusa rámidit dáiddaárvvoštallit ja NRK dáiddaárvvoštalli ii jáhke iežas goassege vajálduhttit Marakatt-Labba čájáhusa. Les på norsk.