WMO åtvarar om store øydeleggingar av syklon

Den tropiske syklonen «Mocha» har styrka seg på si ferd nordaust i Bengalbukta. Verdas meteorologiorganisasjon (WMO) åtvarar no mot store øydeleggingar.

«Mocha» vil truleg treffe lågtliggande delar av Myanmar og delar av Bangladesh. Syklonen er venta å råke Cox's Bazar i Bangladesh, der kring ein million menneske bur i det som blir kalla «verdas største flyktningleir».

WMO anslår at syklonen vil treffe land laurdag.

Vindstyrken kan kome opp mot 220 km/t innan stormen treffer land, som tilsvarer over 60 meter i sekundet, skriv CNN.