Nedgang i ungdomskriminaliteten i Oslo

Talet på barn og unge mellom 10-17 år som blir melde for meir enn fire lovbrot i Oslo, Asker og Bærum held fram med å falle. Det viser Oslo politidistrikt sin 2022-statistikk som blei lagt fram i dag.

– Det auka jamt og trutt fram mot pandemien, før det kom ein betydeleg nedgang. Det spesielle er at det no held fram med å falle, seier Rune Solberg Swahn, leiar av felles eining for førebygging.

Politiet opplyser at det i toppåret 2019 var 224 ungdomar som blei melde til politiet for minst fire lovbrot. I 2022 sokk det til 134, ytterlegare ned 20 frå 2021.

– Erfaringstal tilseier at nedgangen dei to siste åra utgjer 100 potensielle offer som har sloppe å bli utsett for alvorleg kriminalitet, seier Swahn.

For 10-17-åringar var det i 2022 samanlikna med dei tre åra før pandemien prosentvis nedgang i talet på seksuallovbrot (-23,9), skadeverk (-23,7), vinningskriminalitet (-16,9), vald (-8,2) og narkotikasaker (-68,5). For to typar lovbrot har det vore auke: trafikklovbrot (71,3) og økonomisaker (48,6).

Byrådsleiar Raymond Johansen (Ap) meiner utviklinga er positiv.

– Ungdomane våre skal jo vere i skule eller jobb, og ikkje i kriminelle miljø. Om pilene byrjar å peike i riktig retning, så er det bra, seier han.

I 2022 blei totalt 1662 ulike personar i alderen 10-17 år melde til politiet for lovbrot i Oslo politidistrikt. Det er ein nedgang på 5 prosent frå 2021.

Presisering: I den opphavlege meldinga stod det at talet på melde lovbrot held fram med å søkke. Det riktige er at nedgangen som held fram etter pandemien er for barn og unge med meir enn fire lovbrot.