Ekspedisjonen til kronprinsen vêrfast på Grønland
Etter å ha kome seg 30 mil innover isen, er det no bom stopp for kronprins Haakon, Vegard Ulvang og dei andre deltakarane på ein ekspedisjon over Grønland.
– Vi kjem ingen veg. Og vi har eit stykke igjen. Vêrmeldinga det neste døgnet er ikkje all verda, skriv ekspedisjonsleiar og polarhistorikar Harald Dag Jølle i den daglege oppdateringa si frå ekspedisjonen onsdag.
Paradoksalt nok er det finvêr som skaper problem for ekspedisjonen. Dei bruker drakar (kitar) og ski for å kome seg over isen, men plutseleg har vinden stilna.
– Det er jo behageleg, eg nektar ikkje for det – å vakne til solskin og ein teltduk som ikkje blafrar. Men ein drakeseglar blir fort uroleg når det er vindstille, skriv Jølle.
(NTB)