Deanu nieida Signe Marie Fidje Store beasai geasseolympiagilvvuide Rioi mannan vahkkoloahpa go vuittii kvalifiserengilvvuid semifinála Istanbullas, Durkkas.

Son lea vuosttáš Norgga nieida, gii goassege leaš beassan Olympiaheaibungilvvuide.

– Áigon vuojašit Volvoin Norggas Vestlandetis ovttas skihpáriin, muhto dál gal rivde mu plánat. Šaddá gal suohttaset vuolgit Rioi, muitala Fidje Store.

Seamma váttis go Lottos vuoitit

Signe Marie Fidje Store váhnemat eai oro áibbas jáhkkimin ahte sudno nieida dál lea beassan gilvalit OG:in vuosttašjagi senioran.

– Ahte beassat OG:ide vuosttašjagi senioran lea sullii seamma váttis go vuoitit Lottos, muitala Signe Marie áhčči Tor-Ørjan Store čaimmihettiin.

Mannan lávvardaga son oinnii iežas nieidda kvalifiseremin OG:ide ja illugatnjalat golggihedje sihke Durkkas ja Deanus go 20-jahkásaš Signe Marie fidnii bileahta Rioi.

– Ganjalčalmmiid leimmet buohkat šohkas. Eat jáhkkán ahte dát dal livččii geavvat, muitala Tor-Ørjan.

Loga eanet dárogillii dá: Den tårevåte brytebragden: – Like vanskeleg som å vinne i Lotto

Ja vel dá: Signe (20) i tårer etter OL-bragd: – Går ikke an å beskrive

Olus háliidedje saji Rioi

Signe Marie Fidje Store leage vuosttaš nissonolmmoš, guhte lea olahan Olympiaheaibungilvvuide. Norgga heaibunsearvvi presideanta muitala ahte dan lea váttis nagodit.

– Váilevaš bohtosiid geažil ii ožžon Signe Marie earret go ovtta kvalifiserenvejolašvuođa, muitala Tom Holmen.

Guokte OG-saji ledje vel báhcán go Fidje Store oaččui geahččalit goalmmát ja maŋemuš kvalifiserengilvvus.

– Mun jáhkán ahte ledje sullii 50 gilvaleaddji, geat geahččaledje kvalifiseret golmma iešguđet gilvvus, dadjá Holmen.

Nuorra taleanta

Fidje Store ovddeš hárjeheaddji Frode Gundersen Deanu heaibusearvvis ávvudii ovttas gili olbmuiguin ja lohká iežas áigá jo oaidnán ahte Signe lea taleanta.

Dál lea 20-jahkásačča vuosttaš stuorra mihttu ollašuvvan ja Signe Marie beaggá stuorra heaibuntaleantan.

– Eat ábut vuos gal vuordit ahte vuoitá, muhto njeallje jagi geažes, de soaitá son oažžut OG-medálja. Dál soaitá leat vuos menddo árrat, muitala Gundersen, guhte lea leamaš Signe Marie heaibunhárjeheaddji dassái go Fidje Store devddii 16 jagi.

– Sus lea jierpmálaš taktihkka. Signe deaivvada máŋgasiin, geain leat stuorra deahkit, muhto eai buohkat dieđe goas lea buoremus gášvalit. Dasa lea Signe čeahppi, muitala Signe eatni, Anne Fidje Store.

Son válddii nieiddaža mielde vuosttaš heaibunhárjehallamii go lei 10-jahkásaš ja dál logi jagi maŋŋá de lea nieiddaš gearggus OG:in gilvalit.

– Son liikui varra doarrut. Várra lea danne son liikui heaibumii nu bures iige eará valáštallanvugiide, čaimmiha Anne Fidje Store.