NRK Meny
Normal

Vuordináiggedoalut

Vuordináigeráidu: Juovlamánu 3. beaivi

Strikka luer
Foto: Lars Tore Endresen / NRK

Dán jagáš vuordináiggeráiddu lea Beate Heide buvttadan NRK Sámi ovddas

Vuordináigeráidu: Juovlamánu 3. beaivi

Leat máŋga vuogi lágidit vuordináiggedoaluid. Bittami lea gába gii lea lokten Norgga gođđinberoštumi. Iežas movttain son gottiha gođđiid miehta Norgga, ja das šaddet čábbámus lihtiidbassanlihparat barggešiiguin ja minstariiguin.

Skábmamánus Bittami bovdii vuordináiggedoaluide. Son lágidii gođđinprošeavtta 20 osiin, ođđa minsttariiguin golbmii vahkkui. Láigebáhcahasat galge geavahuvvot, ja loahpaslohppii galggai čeabetliidnin šaddat. Gođđinvuohki lei vuonccesgođđin. Go gullen sáni, vássán gođđinprošeavttat ilbme jurdagiidda. Ledjen ovdal gođđan vuonccesmálle sihke vuoncáiguin, gollegomppaiguin ja nuppiid sivdnádusaiguin. Mon dihten ahte lei suohtas, ja dovden ahte illudin.

Ohcen ovddos láiggiid ja gođđinsákkiid, ja ráhkkanin álgit skábmamánus, oktan 8000 ieža gođđinárjálaččaiguin. Juo, olles prošeakta dáhpáhuvai Facebookas. Gelddolaš lei oaidnit makkár minstarat ihte. 120 čalmmi jorbessákkiin ja sullii 40 birastaga minstariin lei beaivválaš gođđin. Dat ádjánii. Ledjen mearridan skeŋket válmmas buktaga juovlaskeaŋkan, nu ahte vertejin geargat. Go unnán gođđen muhtun beivviid, jurdagat ihte: Nas jos in nagot? Nas jos in geargga? Vertejin dávjá movttidahttit iežan, ja jeđđet iežan dainna ahte galgen válbmet dan.

Beate Heide

Dán jagaš vuordináiggeráiddu lea Beate Heide buvttadan.

Foto: Privat

Gođidettiin oidnen nuppiid gođđiid prošeavttain govaid, girjámus ivnniiguin. Ledje holu čáppa diŋggat. Earenoamáš holu lei midjas lei mielahis čábbát. Ja ieš mon čohkken iežan láigebáhcahasaiguin ja jurdilin praktihkalaččat. In máhttán ovttelis jurdilit čábbodaga go vertejin geavahit midjas mus lei, ja dat han lei ge nu prošeakta lei jurdiluvvon. Vertejin duhtat daidda ivnniide mat mus ledje.

Juovlamánu 22. beaivvi mon gergen, ja ledjen hui rámis iežainan. Čeabetliidni lei guokte ja bealle mehtera guhkki. Liktejin dán ja páhkkejin dan čábbát. Ja sutnje geasa galggai? Son lei hui duhtavaš. Ii geasge leat seamma čeabetliidni go sus.

Ieš ledjen nai duhtavaš. Ledjen válbmen vuordináiggedoaluid masa Bittami lei mu bovden. Máŋgasat ledje ge geat válbmeje.