Dán jagáš vuordináiggeráiddu lea Beate Heide buvttadan NRK Sámi ovddas

Vuordináigeráidu: Juovlamánu 2. beaivi

Elna dat lei guhtes muitalii munnje fearána. Son lei mátkkoštan nu holu ovdal juovllaid, ahte ii lean ollen reidet vuordinkaleandara iežas rávis niidii, nugo lei álo dahkan. Dán jagi son duođai ii lean astan. Son lei iežas botnjiin digaštallan dan ásija, ja soai leigga gávnnahan ahte go nieida lei rávis de son máhtii dál heaitit vuordinkaleandariin.

Go nieida riŋgii juste ovdal juovllaid vuordináiggi, eadni lei losses váimmuin muitalan ahte dán jagi son ii lean sádden boastta mielde makkárge skeaŋkakaleandariid. Nieida jaskkodii telefovnnas. De son dajai: – Ii dat daga maidege, don leat lihkka oassin mu kaleandaris.

Elna jávohuvai. Ii ipmirdan maid dat máhtii mearkkašit. De son lei ipmirdan: go son lei juohke jagi gieresvuođas addán vuordinskeaŋkkaid nieidasis, nieida čanai dáid skeaŋkkaid nu garrasit oktii iežas etniin, ahte livččii dego eadni lei mielde nieidda iežas dahkan kaleandaris. Son lei juohke jagi ráhkadan kaleandariid, nieidda váimmus son lei ieš dat kaleandarreidejeaddji ja nu son beasai dán jagi ge oassin. Son beasai oassin visot nieidda vuordinkaleandariidda. Go eadni ii astan ieš reidet kaleandara, de nieida ráhkadii dan ieš, muhto eatni liegga ráhkisvuođain jurdagiin.

Dát muitalus illudahtii ja njuorasmahtii mu. Dat muitala goktes árbevierut fievrriduvvojit buolvvas bulvii, diđolaččat dege ii. Dat nai muitala makkár čiekŋalis luottat uhca hommážat ja skeaŋkkažat máhttet dagahit olbmo váibmui. Mon jáhkán ahte juste dát buorit vásáhusat dat leat mat seailluhit min árbevieruid; mii joatkit árbevieruiguin, go mii háliidit ahte maiddái dat buolvvat min maŋis galget beassat vásihit dan buorrevuođa man mii ieža leat dovdan.