NRK Meny
Normal

Vihtta nuora mielde Nuoraid Sessionis

Dan dálvvi lea Márkomeannu ohcan nuoraid, geat ožžot vejolašvuođa gárvet ja vel ovdanbuktit iežaset šuoŋaid Márkomeannu-festiválas. Boahttevaš násttit leat dál válljejuvvon.

Nuoraidsessions
Foto: Márkomeannu

Emma Elliane Oskal Valkeapää, Hildá Birget Länsman, Elin Kristina Oskal, Ella Marie Hætta Isaksen ja Natalie Carrion leat min boahttevaš násttit.

Emma Elliane lea 16 jagi ja boahtá Guovdageainnus, Finnmárkkus. Son lea lávlun ja čállán lávlagiid dan rájes go lei unni, ja lea juo lea oassálastán MGP jr.:s 2011:s. Oassálastán lea maiddái UKM:s, Sápmi Talentas ja Nordic Light -festiválas. Cuoŋománus son almmuhii vuosttaš skearru ”Dovddut eai gielis”. Son oassálastá dáal Nuoraid Sessionsii vai beassá ovddidit iežas musihka ovttas eará nuoraiguin, geat beroštit musihkas, ja vel oažžut veahki profešunealla musihkkáriin.

Hilda lea 22 jagi, boahtá Ohcejogas Suoma beale Sámis. Son lea juo musihkkaoahpuid bokte álggahan iežas karrieara, ja son sihke lávlu ja juoigá. Lea mielde Solju-joavkkus , geat dán jagi oassálaste Suoma MGP -gilvvus. Su mihttu lea sihkkarastit ahte sámi giella ja juoiganárbi bissu go dan ovddida álbmogii musihka ja musihkkahistorjjá bokte.

Elin Kristina lea 20 jagi, boahtá Saltaduoddaris, Nordlánddas. Son čállá lávlagiid máŋgga gillii, muhto liiko buoremusat čállit sámegillii. Su mielas lea álkit ovdanbuktit ja čilget dovdduid eatnigillii. Son liiko sihke čállit teavsttaid, lávlut ja juoigat! Šaddá gelddolaš oaidnit maid Elin ovdanbuktá Márkomeanus.

Natalie lea 20 jagi, Ruoŧa beale Sámi, Upmi nieida. Laágamus su váimmu lea musihkka ja su kultuvra. Son dáhttu doalahit iežas árbbi juohke lávkkis maid váldá. Son lea bargan viššalit šaddat nu buorren artistan go vejolaš, ja lea gearggus gávnnahit maid Sápmi ja Márkomeannu ovdanbuktet. Son lea ee. Nuoraid lávddis lávlon Johkamohkis. Son illuda juogadit iežas lávlagiid Márkomeanu lávddis geasset.

Ella Marie lea 18 jagi, Deanus Finnmárkkus eret. Dál orru son Álttás, gos vázzá drámálinjjá. Várra lea son didjiide juo oahpis, go son oainnat vuittii dán jagi Sámi Grand Prix! Dasa lassin son lea oassálastán Scene Finnmárkku/ Ung Artist NOW! prošeavttas, ja mátkkoštan Arctic Winter Games oktavuođas ovddastit sámi kultuvrra. Son ráhkada alternatiiva popmusihka, ja sus lea áigumuš bargat musihkain ovddasguvlui.

Dán viđa nuora mielde bohtet maid njeallje musihkkára Márkomeanu lávdái. Joavkkus leat Svein Schultz bássain Jan Ole Kristensen gitárain, Jakop Janssønn rumbbuiguin ja Stein Austrud keyboardain.

Sii čuojahit buohkat Márkomeanu lávddis lávvordaga suoidnemánu 30. beaivve.