NRK Meny
Normal

Sámenuorat Oslos: – Liikon gávpogis orrut

Orrut gávpogis sáhttá leat nu suohtas buot iežas fálaldagaiguin ahte sáhttá šaddat váttisin oba smiehttat ge fárret fas ruovttu báikái.

Irjan Balto ja Solveig Buljo muitaleaba manne soai orruba Oslos

Irjan Balto

MUSIHKKABUVTTADANOAHPUS: Irjan Balto jáhkká ahte bisána Osloi maŋŋá go skuvllas geargá.

Foto: Ánne Kátjá Gaup / NRK

Irjan Balto (20)

Son lea Noroff Fágaskuvlla Jietna- ja musihkkabuvttadan oahpus guovdu Oslo gávpoga ja lohká iežas álo liikon musihkkii.

– House, mun liikon House musihkkii hui bures.

– Rievtti mielde liikon buot lágan musihkkii ja lávlagiidda - dat dat lea ge nu somá, lohká Irjan Balto.

Mun dolken Kárášjohkii ja fárrejin Osloi. Dáppe lea álo juoga mii geavvá. Sáhttá konsearttaide mannat ja bargat maid áigu, maid Kárášjogas ii sáhte nu dávjá.

Irjan Balto

Son jáhkká maid ahte bisána Osloi maŋŋá go skuvllas geargá guovtti jagi geažes. Dál ii gille doapmat gávnnahit maid áigu dan maŋŋá. Irjan hálida oainnát bargat dan maid ieš hálida.

– Oslo lea fiinna gávpot. Mun liikon oahppásmuvvat ođđa olbmuide.

Solveig Buljo

BARGU: Solveig Buljo liiko Osloi ja sávvá ahte fidnešii barggu doppe go oahpuin geargá..

Foto: Ánne Kátjá Gaup / NRK

Solveig Buljo (27)

Mii leat šiehtadan deaivvadit Solveig Buljoin Karl Johan gáhta alde.

Veahá fertet hálahit su go son lea eksamenii lohkamin ja illá astá vuolgit gosa ge.

Son lea muitalan ahte liiko kafeás čohkát ja láve aŋkke moddii mánnui deaivvadit skihppáriiguin doppe. Dál boahtá min deaivat muhtin kafeás.

Mu mielas lea hui suohtas olgun deaivvadit olbmáiguin. Dušše ruovttu ja skuvlla gaskka johtit, dasa gal dolká.

Solveig Buljo

Dál lea Solveig Buljo lohkamin dearvvašvuođajođiheaddje- ja dearvvašvuođa- ekonomiijafágaid Oslo universitehtas. Son lea maid neahta bokte lohkamin prošeaktajođiheami.

Sávan gávdnat fásta barggu dáppe, muhto lean gullan ahte ii leat álo nu álki. Jus boahtá buorre bargofálaldat davvin, de gal ferten smiehttat galggan go fárret vai in.

Solveig Buljo

Solveig lea Mázelaš. Su mielas lea álki finadit smávva mohkiid davvin go Oslos orru.

Mus lea olmmái gii munnje cuigii ahte mun finan gal oba dávjá davvin, lohká son ja čaimmiha.