Lea álki lohkat ahte olmmoš berre hárjehallat valáštallanlanjas, muhto ii leat mihkkige dárbbuid dohko mannat. Persovnnalaš hárjeheaddji Ingá Márjá Sarre (36) lea jo moadde jagi bargan dainna, ja lea jo veahkehan máŋga olbmo beassat buriid vuimmiide.

Son muitala ahte go olmmoš hárjehallagoahtá, de lea dehálaš ahte it álgge nu garrasit, muhto gulul.

– Sáhtát mahkáš álgit guktii vahkkui gievrudahittit iežat, ja dasa lassin lihkadat 20-30 minuhta juohke beaivve. Vázzit, čuollat muoraid dahje hoigat muohttaga leat buorit hárjehallanvugit , muitala Sarre.

Ruovttuhárjehallan

Son lea jo máŋgii ráhkadan ruovttuhárjehallan-plána iežas kundariida, ja sii orrot leamen duhtavaččat dainna. Doppe eai dárbbaš nu olu rusttegiid, dakkáriid maid olbmot geavahit go leat valáštallanlanjas.

• Loga maid: Duhtavaš bohtosiin

– Doppe sáhttet olbmot geavahit iežaset rupmaša, ja eará geahppa rusttegiid nugo mahkáš gummebáddi. Vuođđohárjehallamii dat leat buorit, lohká Sarre.

Go hárjehallá ruovttus de muitala Sarre ahte ferte olles rupmaša lášmmodahttit, muhto lea dehálaš ahte nagoda loktet riekta vai ii čuoza čielgaidja ja olggiide. Muhto sáhttá maiddái leat váttis doalahit movtta, ja dasa lea Sarres ráva:

– Ferte jurddašit bohtosiid birra. Dávjá go lea heajos beaivi, de boahtá hui buorre dovdu maŋŋel hárjehallama. Dalle lea maid hui movttiidahtti go lea nagodan dan, go dat addá olu vuoimmi ja fámuid, muitala.

Jorba bahta ja unna čoavjjáš

Son muitala ahte máŋggas geat hárjehallagohtet háliidit jorba bađa ja unna čoavjjáža, ja liikojit go lihkostuvvet. Son liiku maid oaidnit go su kundarat besset buriid bohtosiidda.

– Go mii vuosttaš geardde mihtida iežamet, ja nubbi mihtideamis jo oaidnit erohusa, de šaddet hirbmat buori millii, ja lohket «Waao! 5 cm! Nu olu go lean seggon», muitala Sarre.
– Sihke mun ja mu kundarat šaddat hui lihkolaččat go buriid bohtosiid olahit. Mus lei okta hárjehalli gii seakkui 10 cm mánus, ja go nu geavvá, de šaddá olbmui maid mokta, lohká Sarre.

Dál lea olu sáhka das ahte olmmoš galgá borrat rivttes borramušaid ja galgá leat šođbat oaidnit, ja ieš gal Sarre borrá dušše ráinnas bierggu. Su ráva lea ahte olmmoš galgá borrat riekta, muhto ii borrat menddo unnán.

– Bora rivttes borramuša, nugo ovdamearkka dihtii ráinnas bierggu. Lea maid dehálaš ahte borat njealje geardde beaivái, ja dasa mun liikon ge, ahte beasan ollu borrat, lohká Sarre.

Dehálaš leat dearvvašlaš

Sarre lea lohkan ollu borramušaid birra. Son lea maid ieš geahččalan iešguđetlágan diehtaid, dakkáriid, mat leat dearvvašlaččat. Su mielas olbmot geat barget olu fitnessain borret menddo unnán.

– Sis leat beare unnán buoideproseantta, ja dat ii leat dearvvašlaš go nu lea guhkit áigge. Go oainnán Instagrámmas fitness-nieiddaid, geain lea hui unnán buoidi, de jurddašan ahte dat ii sáhte leat dearvvašlaš, lohká Sarre.

Viidáseappot muitala ahte sáhttá nu eallit oanehis áiggi, muhto dearvvašvuođa dihtii galgá leat unnimusat 14 % buoidi olmbos.

– Jus beare unnán buoidi lea, de sáhttá massit mánnodávddaid. Olmmoš ferte jurddašit ahte borrá doarvái, ja guldala maid rumaš muitala. Dat lea dehálaš, muitala Sarre.

Borrat maŋŋel hárjehallama

Sarre lea jo muitalan ahte lea dehálaš borrat sullii njealje geardde beaivái, ja muittuha vel ahte lea hirbmat dehálaš borrat maŋŋel hárjehallama.

– Jus ii bora maŋŋel go lea hárjehallan, de rumaš ieš loaktigoahtá dehkiid - dat šaddá dego kannibála. Dalle leat duššáš hárjehallan, nu ahte mun in goassege ávžžut olbmuid orrut borakeahttá borranáiggiid, dalle seastigoahtá rumaš buoiddi, muitala Sarre.