NRK Meny
Normal

Rámbuvrras dadjalii "Giitos"!

Kalimera! Geassi lea nohkan, mii leat mátkereivve ožžon lulliriikka mátkkošteaddjis.

hotealla

Ellen Marianne Siri lea geasset Greikkas čállán mátkereivve.

Foto: Privat

Ellen Marianne Siri lei geasset mátkkošteame Greikkas iežas irggiin. Loga mátkereivve.

– Ledjen oaidnán Greikka filmmain ja dan rájes lea mus leamaš hui miella dohko vuolgit. Muđui ledjen maid gullan dat lea fiinna riika. Irgi gal ii nu beroštan das gosa vulggiime.

Movt lei orrunbáiki?


– Moai oruime Minoa Palace Resort&Spa nammasaš báikkis. Dat lea 5-násttat hotealla. Leimme hui speanttat oaidnit makkár doppe lei ja dat gal lei hui fiinnis. Go bođiime de lei “pikkolo” vuordime munno ja hoiggai munno koffariid gitta latnjii gollevovnnain. Lei hui fiinna latnja ja muđui lei hoteallas hui fiinnis. Doppe gal lei buot maid oba sáhttá ge dárbbašit. Máŋga boradanbáikki ja bára, tennisšillju, basseaŋggat, mánáide stoahkanbáiki, unna rámbuvrráš, hárjehallanlanjat, spa ja olu eará vel. Leimme hui duhtavaččat dainna orrunbáikkiin. Ledje hui siivos ja veahkkás olbmot doppe. Doppe sáhtii maid latnjii diŋgot biepmu. Dan dagaime oktii.

drink

Ellen Marianne návddaša njálgga juhkosa.

Foto: Privat


Makkár lei dálki?


– Leimme geahččan dálkedieđáhusa ovdalgo vulggiime ja das oinniime ahte guokte beaivvi galggai arvit. Ii arván ovttage beaivvi ja lei hui beaivvádat juohke beaivvi. Lei hui báhkka juohke beaivvi.


Maid barget doppe?


– Dieđusge velohalaime olu beaivváš ovddas,dahje mun goit velohallen olu beaivvadatseaŋggas. Muđui vuojadin, gávppašeimme, finadeimme nuppi gávpogis, vujiime čáhceskuhteriin, spilliime tennisa,minigolffa ja diekkáriid. Eahketbeallái manaime váccašit gávpogii, geahččat mii doppe oidno, vázzit rámbuvrraid mielde ja geahččaladdat ain ođđa boradanbáikkiid.

fishspa

Greikkas válddii son “fish spa”.

Foto: Privat


Maid oidnet doppe?


– Hui olu olbmuid, rámbuvrraid ja hoteallaid! Muđui oidnen steažžalággáid, ártegis divrriid, juohkelágan olbmuid ja biillaid. Ovtta beaivvi leimme vázzán hui guhkás bajás boradanbáikái. Doppe oinniime olles gávpoga ja lei hui várddus meara guvlui. Hui romanttalaš maid lei go beaivi badjánii ja maiddái de go jávkagođii. Gal doppe lei olu oaidnámuš ja livčče sihkkarit vel eanet maid oaidnit.


Movt lei báiki?


– Gal dat lei hui fiinnis! Ledjen gullan ahte lulliriikkain láve sáhttit leat nu duolvvas ja nie. Doppe gal eai lean ruskkat olu ja unnán luovoseallit. Moadde bussá dušše oinniime. Hui báhkka gal lei, vaikko moai ean gal lean doppe dan áigodaga go lea duođai báhkka! Doppe ledje ártegis divrrit, dakkár stuora čáhppes garra divri, mii girddii. Muđui gal eai lean divrrit, mat munno givssidedje gal.


Movt lei sáttogáddi doppe?


– Sáttogáddi, mii lei munno hotealla lahka, ii lean gal nu vuogas. Doppe lei čieŋal ja ledje smávva geađggit. Veahá dobbelis lei fiinna gáddi. Finaime Agii Apostolis máhce ja doppe lei hui fiinna sáttogáddi, gos gal buori ládje vuojadin.

stranda

Ellen Marianne mielas ii lean sáttogáddi nu vuogas, go lei čieŋal ja olu smávva geađggit.

Foto: Privat


Movt ledje báikkálašolbmot? Ledje go smáđáhkes olbmot?


– Báikkálaš olbmot ledje nu siivut ja ráfálaččat! Sii ledje hui somás ja leaikás olbmot. Ii dovdan goassege unohisvuođa rámbuvrrain ja muđui gávpogis. Sii eai bahkken gálvvuiguin turisttaid ala ja eai bággestallan oastit diŋggaid. Dasa liikojin hui bures, go lean gullan ahte muhtin riikkain lea áibbas nuppe ládje.


Lei go njálgga biebmu doppe?


– Biebmu lei hui njálggat! Souvlaki lei hui buorre, dan gal ávžžuhan buohkaid borrat! Doppe ledje dieđusge maid “dábálaš” biepmut nu go hamburger, vuoksádeahkki, pizza jna. Gyros ja souvlaki ledje buorit Greikka biepmut.

is

Lieggasis lea buorre gálbma jieŋa borrat.

Foto: Privat


Mii lei erenoamáš Greikkas?


– Greike lea mu mielas hui čáppa báiki, mii lea sihkkarit beakkánin šaddan muhtin muddui filmmaid bokte. “Mamma Mia” filbmejuvvui doppe ja maiddái eará filmmain lea dat báiki oidnon. Greikkas leat čáppa sáttogáttit ja orui maid dakkár báiki, gos lea fiinna dálki. Geassemánu álggus goit lei hui fiinnis, ii lean jur nu báhkka ahte ii nagot lihkadit.


Mii lei heittot dahje láittas Greikkas?

– Hmm. Áidna mii lei heittot lei sáttogáddi hotealla lahka. Hui ártet gal lei maid go eai lean albma seaŋgagávnnit, muhto dušše láken, man siste galggai oađđit. Lean gullan ahte nu lea eanaš lieggariikka hoteallain, nu ahte dasa ii dieđusge veaje maidege. Muđui in gal dieđe maidege eará láitit!


Ohppet go makkárge sániid greikkagillii?


– Ohppen ovtta. Kalimera! Dat mearkkaša “Buorre iđit”. Muhtiinat gal vigge hupmat mu irggiin suomagillii! Dat lei veahá somá.Go sámástat lulliriikkain, de doivot min suopmelažžan. Leimme rámbuvrras ja de dadjalii bargi sutnje: Giitos! Hehe, gal moai de reaškkiheimme!


Lei go mihkkege maid livččet áigon vásihit muhto it ollen/šaddan?


– Gal dat lei olu! Leimme dušše vahku nu ahte ii oro das olleme nu olu. Livččen áigon riidet heasttain sáttogáttis, mannat fanasmátkái ja doppe buokčalit merrii, finadit eanet gávpogiin ja dieđusge vel eanet veallát beaivváža ovddas!

svømmer

Luomus návddašii Ellen Marianne eallima.

Foto: Privat


Leat go makkárge rávvagat daidda, geat dohko leat vuolgime?


– Jus vuolgá dohko, de galggašii goit beaivváš ovddas velohallat, mearas vuojadit, vuodjit čáhceskuhteriin. Maiddái berre mannat Elafonissi sáttogáttis! Dan lohket nu fiinnisin ahte gohčodit dan “Greikka Maldivat”. Dohko ean ollen ieža gal, muhto jáhkán ahte dohko gal lea veara vuolgit!


Vuolggášit go fas Greikii?

– Vuolggášin! Dal juo lean geahčadeame gosa nuppes galggašii vuolgit! ;) Greikkas han leat olu sullot, sihke stuorát ja smávit sullot nu ahte dat lea stuora válljenmunni.

Ellen Marianne Siri

mátkereivve čálli, Ellen Marianne Siri.

Foto: Privat