NRK Meny
Normal

Ođđa skearru almmuhan

Ovddit vahkus almmuhii Somby -joavku ođđa skearru – «Viimmat».

SomBy fra Finland under generalprøven på Sámi Grand Prix 2009.
Foto: Dan Robert Larsen / NRK

Unna Maari Pulska, guhte čuojaha rumbbuid Somby -joavkkus, mielas lea hui somá go dál leat almmuhan skearru «»Viimmat».

– Mii leat hui ilus go mii leat almmuhan skearru dál, ja mii sávvet ahte olbmot fuomášit dan ja liikojit dasa maid mii leat ráhkadan, lohká Unna Maari.

Unna-Maari Pulska

Unna Maari Pulska čuojaha rumbbuid Somby -joavkkus.

Foto: Privat

Somby lea jo čuojahan ovttas 7 jagi, ja šadde dovddusin 2009:s, go dalle vuite Sámi Grand Prixa ja Liet lávlun-gilvvu. Muhto lihkká go joavku lea čuojahan nu guhká, de ii lea sis makkárge plána rievdadit iežaset.

– In jáhke ahte mis šaddá makkárge stuorra rievdadusaid. Mis lea dál leamašan unna bottoš, ja mii eat leat čuojahan nu ollu almmolaččat. Dál lea mis dego ođđa álgu, nu ahte mii áigut čuojahit eanet konsearttaid, muitala Unna Maari.

Ođđalágan musihkka

Vaikko vel joavku ii rievddage nu olu, de leat musihka veahá ođasmahttán.

– Vuođđu lea oalle seammalágan go min ovdalaš musihkas, muhto dál leat lasihan eanet ritmmaid ja gullo máŋggabealatvuohta min musihkas, muitala Unna Maari.

Sii šadde dovddusin «Ii iđit vel» šuoŋain, ja máŋggas dovdet sin dan bokte. Ođđa musihkas ja dán šuoŋas lea gal hui stuorra erohus.

Somby ođđa skearru

SomBy ođđa cd-skearru.

Foto: SomBy

– In dieđe sáhttá go veardádallat min vuosttaš musihka dainna, maid mii leat ráhkadan dál, muhto dáin bihtáin lea gal hui seammalágan mokta, muitala.

Ádjánan skearruin

Sii leat bargan dáinna skearruin 3-4 jagi. Son muitala ahte ii lea leamaš nu váttis bargat dainna, muhto sis lea leamašan moadde praktihkalaš ášši dan skearru hárrái.

– Orru ahte aiddo dán skearru leat duođaid ádjánan guhká ráhkadit. Dál leat mii viimmat almmuhan dan! Nu lea go musihkain bargá, ahte ádjánit gal soaitá, lohká Unna Maari.