Sara Katrine Aleksandersen (14) lea bargguid siste, neaskinfiellu julggiid gaskkas ja jiehkku gieđas.
– Mun lean neaskime dán sistti, mas mii galgat goarrut sisteveaskkuid, muitala Sara Katrine.
Njeallje Guovdageainnu nieidda, 15 jagis 14 jahkái leat guokte vahku juo maŋŋá skuvlla deaivvadan kurssas oahppat sisttiid dikšut. Vuosttaš vahku lokte ja navildedje duljjiid, dál leat neaskit oahppamin.
– Makkár lea dát bargu?
Sara Katrine Aleksandersen (14) lea okta ohppiin kurssas.
Foto: Ánne Kátjá Nilsdatter Gaup / NRK– Lea duolva bargu, muhto lea suohtas go mis lea vejolašvuohta dákkáriid bargat. Dát lea hui divrras oahppu.
– Dál ii leat šat nu dábáláš ieš dikšut sisttiid go ovdal lei. Dál leat olu oastosisttit. Mu mielas lea hui dehálaš oahppat dán, ja de fas seailluhit viidásit dán oahpu, lohká Sara Katrine.
Olu bargu
Son lea álgán kursii oahppama dihte, muhto seammás beassá earáiguin fárrolaga oahppat, mii lea hui suohtas.
Sara Katrine lea ovdal leamaš mielde dákkár bargguin, muhto ii nu olu go dál. Dál bargá buot ieš álggu rájes.
Nuorat ohppet maid giela barggu bokte.
Foto: Ánne Kátjá Nilsdatter Gaup / NRKNuorat besset maiddái oaidnit mo industriija neaskinmášiidna doaibmá. Muhto dan eai beasa gal ieža lihkahallat. Duodjeinstituhta direktevra Inga Hermansen Hætta lea boahtán veahkkin.
Dáinna mašiinnain neaskkesta sistti minuvttas, čájeha Duodjeinstituhta Inga Hermansen Hætta.
Foto: Tanja Norbye / NRK– Dát lea dan mađe várálaš mášiidna ahte dušše mii geat leat kursejuvvon ja oahppan dáinna bargat, beassat atnit dan, muitala Hætta.
Mášiidna neaská sistti minuvttas. Muđuid han lea neaskin áddjás ja lossa bargu, muittuha son ge.
Čiŋadit iežaset dujiin
Oahpaheaddji Ellen Sara Eira Buljo lea duhtavaš nuoraiguin.
– Dá leat hui áŋgiris nuorat. Gal dan ieš juo oainnát dás, rámpu son.
Ellen Sara Eira Buljo lea oahpaheaddji kurssas.
Foto: Tanja Norbye / NRK– Manne jáhkat nuoraid háliidit oahppat dáid bargguid?
– Na besset čiŋadit iežaset ráhkaduvvon sisttiin. Ja de vel somá oahppat juoida maid eai soaitte leat ovdal bargan.
Giela oahppat
Giellagiisá giellaguovddáš dat lágida dán kurssa. Kursa lea 14-19 jahkásaččaide. Ulbmil lea ahte nuorat barggu bokte oahpašedje giela.
Oahpaheaddji Ellen Sara Eira Buljo muitala ahte go barggadettiin oahppá giela, de dat darvána maid muitui buorebut.
Sara Katrine duođašta dán.
– Dovddan mun oahpan daid saniid go praktihkkalaččat barggan, dadjá Aleksandersen.
