– Liikon buohtastahttit sámegiela ja nenetsagiela danne go dat leaba seamma giellabearrašiš. Láven muhtomin gávdnat seammalágan sániid, muitala son áŋgirit.

Son dárbbáša dán oahpu iežas skuvlabáhpiriidda, ja maŋŋel go giđđát geargá Guovdageainnus, de fárre St. Petersburgai čállit bachelorbarggu.

Nechei Serotetto lea studeanta Sámi Allaskuvllas ja muitala ahte sus leage eksámen juovlamánus. Danne hárjehallá juohke beaivvi maŋŋel skuvlla, sihke ákto ja earáiguin. Son láve maid dađistagá čállit váttes sániid maid oahppá ja geardduha daid sániid dassažii go bisánit muitui.

• Loga maid: Aili Keskitalo håper urfolk blir hørt i Paris

– Ruovttus maŋŋel skuvlla mun logan mánáidgirjjiid, ja hárjehalan hupmat olbmuiguin. Muhtomin hárjehalan ránnjáin. Son maid vázzá seamma kursas, ja hupmá maid ruoššagiela, muitala son.

Oaidná erohusaid boazodoalus

Serotetto ja su bearaš barget bohccuiguin ruovttus Jámálas, Ruoššas. Čakčat lei son muhtun boazosiidda mielde gárddástallame Guovdageainnus, ja doppe fuomášiige erohusaid boazodoalus.

– Lei earaládje go mis Jámálas. Nenetsat orrot bohccuiguin, ja johtet juohke beaivvi ealu mielde. Guovdageainnus vujiimet biillain gárddi lusa. Jámálas mii dušše vuodjit bohccuiguin, muhto dálvet muhtomin vuodjit skohterin, muitala son.

Liiko duddjot sihke sámi ja nenetsa dujiid

Go Nechei ii leat bargame skuvllabargguid, de duddjoda ruovttus. Dál lea goarrume nenetsa biktasa láđđis mainna áigu čiŋadit Guovdageainnus. Son čilge ahte minsttarat muittuhit bohccočorvviid. Son lea maiddái gorron sámi veaskku sisttis, ja háliidivččii vel gápmagiid goarrut.

– Áiggun jearrat muhtun olbmá veahkehit mu goarrut dálvegápmagiid, lohká son.