Rupmašis ii galggašii dárbbašit heahpanit. Muhto rumašideála, mii ii gula kultuvrii, lea ollegoahtán maiddái Ođđa-Selándda maoriálbmoga nuoraide.
Te Kaha-nammasaš báikkis deaivvada NRK maorinieiddain; 14-jahkásaš Isabella Parkinson.
Boahte vahkus áigo lágidit sierralágan faláštallangilvvuid.
– Danin leatge mii dál vuovdimin dáidagiid, ja čohkkemin ruđa. Dát lea beassan dihtii lágidit spábbadoaškungilvvuid.
– Dáin gilvvuin áigut fuomášuhttit ahte nieiddat heahpanit iežaset rupmašiin. Doaivumis ávkkuha eastadit dán fuones rumašideálagova leavvama, dadjá Parkinson.
«Body Shame»
Isabella Parkinson muitala ahte nuorra maorinieiddat leat álgán unohasláhkai skihpáriid gohčodit.
Dán virrui lea biddjon sierra doaba – «body shame»; heahpanit mo olbmo rumaš lea oaidnit.
– «Body shame»-oasis lea ahte nuorra nieiddat lea gohčodišgoahtán nuppi buoidin ja ropmin. Nu ii heive dadjat min kultuvras, šuohkiha Isabella.
- Loga maiddái: Isabella ii vuolláičále iežas dáidaga – sámi dáiddastudeanta ballá dáidaga suoláduvvot
Sivahallá oarjemáilmme čábbodatkultuvrra
Oarjemáilmme nissonideála váikkuheapmi dadjo leat sivvan dása.
– Ruoinnas, guoirras, unni ja gabba – na, nie eat leat gal mii.
– Mii leat allat ja kievrrat, ja máhttit vissa maid dadjalit, čuoččuha Isabella Parkinson.
Son dovddasta ahte sus eai leat gal aiddo nu čuvges jurdagat bohteáigái.
– Balan mii leat juo rievtti mielde vuoittáhallan dán «soađi» oarjemáilmme vuosttá, dadjá loahpas.
