NRK Meny
Normal

Ná vuostálastá Isabella (14) rumašideála

TE KAHA (NRK): Oarjemáilmme rumašideála lea ollegoahtán maiddái maorinuoraide. – Diet lea áibbas amas midjiide – diet ahte iežas rupmašis heahpanit, dadjá nuorra maorinieida.

Isabella Parkinson

GEAHČA VIDEO: – Ruoinnas, guoirras, unni ja gabba – na, nie eat leat gal mii.

Rupmašis ii galggašii dárbbašit heahpanit. Muhto rumašideála, mii ii gula kultuvrii, lea ollegoahtán maiddái Ođđa-Selándda maoriálbmoga nuoraide.

Te Kaha-nammasaš báikkis deaivvada NRK maorinieiddain; 14-jahkásaš Isabella Parkinson.

Boahte vahkus áigo lágidit sierralágan faláštallangilvvuid.

– Danin leatge mii dál vuovdimin dáidagiid, ja čohkkemin ruđa. Dát lea beassan dihtii lágidit spábbadoaškungilvvuid.

– Dáin gilvvuin áigut fuomášuhttit ahte nieiddat heahpanit iežaset rupmašiin. Doaivumis ávkkuha eastadit dán fuones rumašideálagova leavvama, dadjá Parkinson.

Maori-nieiddat

«Body Shame»

Isabella Parkinson muitala ahte nuorra maorinieiddat leat álgán unohasláhkai skihpáriid gohčodit.

Dán virrui lea biddjon sierra doaba – «body shame»; heahpanit mo olbmo rumaš lea oaidnit.

– «Body shame»-oasis lea ahte nuorra nieiddat lea gohčodišgoahtán nuppi buoidin ja ropmin. Nu ii heive dadjat min kultuvras, šuohkiha Isabella.

Sivahallá oarjemáilmme čábbodatkultuvrra

Oarjemáilmme nissonideála váikkuheapmi dadjo leat sivvan dása.

– Ruoinnas, guoirras, unni ja gabba – na, nie eat leat gal mii.

– Mii leat allat ja kievrrat, ja máhttit vissa maid dadjalit, čuoččuha Isabella Parkinson.

Son dovddasta ahte sus eai leat gal aiddo nu čuvges jurdagat bohteáigái.

– Balan mii leat juo rievtti mielde vuoittáhallan dán «soađi» oarjemáilmme vuosttá, dadjá loahpas.